QR Bilim jáne ǵylym ministri Ashat Aimaǵambetov memlekettik bilim grantyn utyp alǵan stýdenttiń arnaiy banktik shotyna oqý aqysyna qajetti qarjyny aýdarý ne úshin qajettigin túsindirdi, dep habarlaidy QazAqparat.
«Memleket basshysynyń joǵary bilim berýdi qarjylandyrý júiesin ózgertý jónindegi bastamasynyń mańyzdylyǵy týraly egjei-tegjeili túsindirip ótsem. Búgingi tańda otandyq joǵary oqý oryndary grant berý arqyly jan basyna qarjylandyrýǵa kóshti. Bul júie qazir qalai jumys isteidi? Grant alý úshin talapkerler Ulttyq biryńǵai testileýge qatysady. UBT tapsyrǵannan keiin talapker ótinish beredi, naqty mamandyqty tańdap, granttardy taǵaiyndaý konkýrsyna qatysady. Máselen, eger belgili bir mamandyqqa barlyǵy 100 grant bólinse, kvotalardy esepke ala otyryp, eń joǵary ball jinaǵan 100 talapker saralanǵan tizim boiynsha JOO-da oqý úshin grant alady. Bilim grantyn ielengen stýdent joǵary oqý ornyn tańdaidy jáne JOO osy stýdentti oqytý úshin biýdjetten qarjylandyrý alady», - dep jazdy ministr Facebook-paraqshasynda.
Alaida, onyń atap ótýinshe, stýdent grantty jeńip alǵanyna qaramastan, memleket tarapynan tólenetin oqý aqysyna qatysty rásimge qatyspaidy. Shyn máninde, stýdent joǵary oqý ornyndaǵy oqý aqysyn memleket onyń mektep kezindegi jaqsy kórsetkishteri úshin tóleitinine mán bermei, muny kóbine kóp tegin oqý dep qabyldaidy. Sáikesinshe, «tegin» oqý kezinde ýniversitetke qandai da bir talap qoiý qiyn. Árbir stýdenttiń oqýy úshin memleket joǵary oqý ornyna orta eseppen 3,5-4 million teńge bóledi.
«Oqý aqysyn tóleý algoritmi kelesidei: ýniversitetter stýdentterdiń tizimderi men tóleý aktilerin belgili bir merzimdilikpen ministrlikke jiberedi. Ministrlik stýdentterdiń árqaisysy úshin aqshany joo-nyń shotyna tikelei aýdarady. Iaǵni, stýdenttiń ózi bul úrdiske qatyspaidy. Endi Memleket basshysy qarjylandyrýdyń osy júiesin ózgertýdi tapsyrdy. Budan bylai qarajat grantty jeńip alǵan stýdenttiń oqý aqysyn óz betinshe tóleýi úshin arnaiy banktik shotyna (eskroý-shot) tikelei jiberiledi dep josparlanýda. Osylaisha, stýdent onyń oqýy úshin memleket bólgen aqshany kórip, qoldaýdy sezinedi. Sonymen birge oqý aqysyn tóleý úrdisine qatysady», - dedi Ashat Aimaǵambetov.
Ministr qazirgi tańda stýdent burynǵydai tegin qyzmetterdi alýshy emes, qyzmetterge tapsyrys berýshi bolyp sanalatyndyǵyn basa aitady. Soǵan orai ol tapsyrys berýshi retinde sapaly bilim berýdi talap etýge quqyly.
«Árine, bul stýdenttiń memlekettik qoldaý is-sharalaryn qabyldaýyna oń áser etedi jáne onyń boiyndaǵy jaýapkershilikti arttyrady. Milliondaǵan qarajattyń oqýǵa jumsalǵanyn kórip, stýdent bilim alýǵa da, kórsetiletin qyzmet sapasyna da jaýapkershilikpen qaraidy. Bul rette stýdent biýdjet qarajatyn bilim alyp jatqan JOO-ǵa oqý aqysyn tóleýden basqa, ózge maqsattarǵa jumsai almaidy. Budan basqa, bul tetik sybailas jemqorlyq táýekelderin de joiyp, biýdjet qarajatynyń barynsha ashyq jumsalýyn qamtamasyz etedi. Atalǵan is-shara joǵary bilim berý salasyndaǵy básekelestikti kúsheitedi dep kútilýde. Memleket basshysynyń osyndai mańyzdy tapsyrmalary búkil bilim berý júiesin keshendi jaqsartýǵa baǵyttalǵanyn atap ótkim keledi. Bilim jáne ǵylym ministrligi qoiylǵan mindetterdi oryndaý úshin barlyq qajetti jumysty júrgizedi», - dep túiindeidi oiyn ministr.
