Foto: Oqý-aǵartý ministrligi
Burynǵy Oqý-aǵartý ministri Ashat Aimaǵambetov senator Gúlmira Kárimovanyń otbasy men týystaryna kóńil aitty, - dep habarlaidy "Ult aqparat".
"Áriptesimiz - bilim berý salasynyń úzdigi, ustaz, Oqý-aǵartý ministrligi Orta bilim komitetiniń tóraǵasy Gúlmira Rainbekqyzy dúnieden ótti. Sený qiyn.
Keshe ǵana Senat depýtaty bolyp sailanýymen telefon arqyly quttyqtaǵanymda, dúisenbi kúni kabinetine baryp, jeke quttyqtap, kezdesemiz dep josparlap otyr edik.
Óte eńbekqor, óz isiniń sheberi bolǵan biregei qyzmetker edi. Kún-tún demei eńbek etti. Óte meiirimdi, kórkem minezdi, bilimdi tulǵa" - dep jazdy eks-ministr Facebook paraqshasynda.
Aimaǵambetovtyń sózinshe, osyndai jaqsy azamatshamen birge jumys isteý úlken maqtanysh bolǵan.
"Gúlmira Rainbeqqyzy bilim berý salasynyń barlyq deńgeiinde jaýapty qyzmet atqardy. Eńbek jolyn mektep muǵalimi bolyp bastap, mektep direktory, qalalyq bilim bóliminiń basshysy, oblystyq bilim basqarmasynyń basshysy, ministrliktiń Orta bilim komitetiniń tóraǵasy qyzmetine jetip, elimizdiń bilim berý salasyn damytýǵa úlken úles qosty.
Bul - oqý-aǵartý salasy úshin orny tolmas qaza.
Árqashan kúlimdep júrip, ujymdy biriktirip, barlyq tapsyrmalardy joǵary deńgeide oryndap, ministrliktiń syily da qadirli qyzmetkeri bolǵan Gúlmira Rainbeqqyzynyń imany salamat bolsyn! Barlyq jaqyndaryna, týystaryna, shákirtterine, áriptesterine qaiǵyryp kóńil aitamyn. Imandy bolsyn!" - dep jazdy ol.
