Bilim jáne ǵylym ministri Ashat Aimaǵambetov ózi basqaryp otyrǵan vedomstvo jumysynyń tiimdiligin arttyrý joldaryn atady, dep habarlaidy "Ult aqparat".
«Máselen, negizgi bólimshelerdiń jumysynda basty nazar strategiialyq basymdyqtardy anyqtap, bilim berý saiasatyn belgileýge emes, aǵymdaǵy operatsiialyq-sharýashylyq jumystarǵa aýdarylǵan. Mektepke deiingi jáne orta bilim berý, TjKB jáne joǵary jáne joǵary oqý ornynan keiingi bilim berý sekildi negizgi departamentter óz quziretin jatpaityn qyzmet atqarady. Atap aitqanda konkýrstyq rásimderdi júrgizý, memlekettik satyp alýlardyń tehnikalyq sipattamalaryn ázirleý, atqarylǵan jumystardyń esebin qabyldaý, aktilerge qol qoiý, biýdjettik ótinimderdi jasaý jáne taǵy sol sekildi... Sóite tura, normativti qujattarmen jumys isteý jáne óz salasyndaǵy jumysty úilestirý siiaqty basty mindetterine qajetti deńgeide kóńil bólinbei keledi», - dep jazdy ministr Facebook paraqshasynda.
Ashat Aimaǵambetov birqatar qyzmetkerler men bólimshelerde fýnktsiialardyń qaitalanýy men qarama-qaishylyqtardyń anyqtalǵanyn atap ótedi.
«Qurylymdyq bólimshelerdiń júktemelerin taldaý da osyndai sáikessizdikterdiń kóp ekenin kórsetti. Joǵary jáne joǵary oqý ornynan keiingi bilim berý departamentiniń bir qyzmetkeriniń júktemesi basqa servistik departamenttegiden 7 ese artyq. Osy jáne basqa da máselelerdi sheshý úshin ministrliktiń qurylymynda birqatar ózgeris bolady. Endi memlekettik satyp alý, oryndalǵan jumystardyń aktilerin qabyldaý, biýdjetti igerý, tehnikalyq sipattamalardy jasaý siiaqty barlyq mindetter qarjy departamentine júkteledi. Biýdjettik ótinimderdi ázirleý máselelerimen aldaǵy ýaqytta Biýdjettik josparlaý departamenti ainalysady», - deidi ol.
Ministr vitse-ministrler men salalyq departamentteri tek óz baǵyttary boiynsha memlekettik saiasatty qalyptastyrýmen, osy salalardaǵy qyzmetti quqyqtyq qamtamasyz etýmen jáne úilestirýmen ainalysatynyn jetkizdi.
«Bilim jáne ǵylym salasyndaǵy baqylaý komiteti sapany qamtamasyz etý jónindegi komitet bolyp qaita qurylady. Demek komitettiń missiiasy men mindetteri de ózgeredi. Endigi mindet - tártip buzýshylyqty tekserý men anyqtaý ǵana emes, sonymen birge ádistemelik kómek kórsetý. Óitkeni, maqsatymyz - tekserý emes, sondyqtan komitet qandai synypta, qandai taqyryp boiynsha, qai jerde kemshin tus, túitkil bar ekenin kórsetip, osy máseleni sheshý úshin egjei-tegjeili usynystar beredi. Mektepke deiingi jáne orta bilim departamenti qyzmetkerleriniń sany basqa bólimshelerdiń jumyskerleriniń esebinen artyp, mektepke deiingi jáne orta bilim komiteti bolyp qurylady. Bul rette ministrliktiń jalpy shtat sany artpaidy, onyń ústine bos jumys oryndary esebinen biraz qysqartý josparlanyp otyr», - deidi ministr.
Ashat Aimaǵambetov ministrlik qyzmetkerleriniń biliktiligin arttyrý jáne oqytý arqyly olardyń áleýetin kúsheitý jóninde jeke baǵdarlama bekitiletinin atap ótti.
«Kýrstarǵa jáne magistratýrada oqytýǵa jiberý jónindegi maqsatty baǵdarlama daiyndalýda. Ózgerister ádette adamdardy jaily ornynan qozǵaityny belgili. Degenmen, biznes-úderisteri, laýazymdyq nusqaýlyqtar jáne árbir bólimshe men qyzmetkerdiń fýnktsionaly naqty aiqyndalyp, negizgi basymdyqtar men mindetterdiń durys qoiylýyna, óz kezeginde jumysymyzdyń tiimdiligin arttyrýǵa múmkindik beretinine senimdimin», - dedi ol.
