Túrkistandaǵy 5-synyp oqýshysynyń ólimine qatysty tergeý sharalary aiaqtalǵan joq. Biraq qazirdiń ózinde mektepte óreskel tártipbuzýshylyqtar anyqtalyp otyr. Bul týraly bilim jáne ǵylym ministri Ashat Aimaǵambetov aitty, dep habarlaidy Sputnik Qazaqstan tilshisi.
"Atalǵan oqiǵa týraly esti sala balalar quqyǵyn qorǵaý komitetiniń tóraǵasy, meniń orynbasarym basqa áriptesterimizben Túrkistan oblysyna attandy. Olar barlyq mán-jaidy bilip, taldaý jasap shyqty. Qazir tergeý sharalary júrgizilip jatyr. Sonyń ishinde sot-meditsinalyq saraptama da bar. Árine, bul - úlken tragediia. Tergeý nátijesi boiynsha tiisti sheshim qabyldanady.
Jalpy atalǵan óńirde osy sekildi faktiler baryn jasyrmaý kerek. Tergeý isi aiaqtalmai jatyp boljam jasaýǵa erte ári durys emes. Óitkeni bolǵan isti tergeý quqyq qorǵaý organdaryna tiesili.
Bizdiń mamandar ótkizgen tekseris kezinde mektepte oqý jumysyn uiymdastyrý jaǵynan óte óreskel tártipbuzýshylyqtar anyqtaldy", - dedi Aimaǵambetov ortalyq kommýnikatsiialar qyzmetinde ótken onlain brifingte.
Ministr mektepte naqty qandai tártipbuzýshylyqtardyń anyqtalǵanyn da aitty.
"Ol jerde balalardy tamaqtandyrý jumysynan bastap tárbie jospary, mektep psihologtary men áleýmettik pedagogtar jumysy, tárbie jáne taǵy basqa jumysqa jaýapty meńgerýshilerdiń qyzmetine qatysty úlken qatelikter anyqtaldy. Tergeýdiń nátijesine qaramastan, osy tártipbuzýshylyqtar boiynsha tiisti sharalar qoldanylady", - dep atap kórsetti Aimaǵambetov.
Qazirgi kezde mektep direktory jumysynan ýaqytsha shettetildi. Ministrdiń aitýynsha, Túrkistan oblysyndaǵy birqatar bilim berý mekemede dál sondai tártipbuzýshylyqtar anyqtalǵan.
Oqýshynyń ólimi
Ótken aptada Túrkistanda 5-synyp oqýshysy kóz jumdy. Ájesiniń aitýynsha, ony aqsha taýyp bere almaǵany úshin sotqar synyptasy mektep dárethanasynda soqqyǵa jyqqan. Jaraqat alǵan bala birneshe kún aýyryp, aqyry aýrýhanada kóz jumǵan.
Balanyń jaqyndary oqýshylarǵa bas-kóz bolmaǵan mektep ujymy men der kezinde kómek bermegen dárigerlerge narazy.
Ájesi balalar ony dárethana ishinde urǵanyn aitty. Basynan qatty soqqy alyp, qan uiyp qalǵan. Odan keiin tamyry qysylyp, búiregi isip ketken.
Ramazan oqyǵan №18 mektep-gimnaziiada álimjettik kóp bolady degen áńgime ata-analar arasynda kóp aitylady eken.
Biraq mektep direktory ony joqqa shyǵardy. Tipti ata-analarmen jinalys ta ótkizipti. Biraq ol otyrysta synyptaǵy sotqarlyq týraly sóz bolǵan joq, dedi direktor.
