«Ashyq dialog 2» suhbatynyń kezekti sanynda QR Prezident ákimshiligi basshysynyń birinshi orynbasary Dáýren Abaev azamattyq mamandyq ieleriniń ailyǵyn arttyrý máselesi týraly pikir bildirdi, dep habarlaidy QazAqparat.
«Muǵalimderdiń ailyǵyn kótergende de dál osylai synaǵandar bolǵan. 2020 jyly muǵalimderdiń ailyǵy ósti de, pedagogika mamandyǵyna túsý baly kóterildi. Iaǵni áleýeti joǵary mamandar pedagogikaǵa baryp jatyr degen sóz. Sonyń arqasynda bilim sapasy da artady. Aýylǵa qaladan kóship baryp jatqan jas pedagogterdiń sany qazirdiń ózinde ósip jatyr. Buǵan deiin olardy aýylǵa shaqyrýdyń túrli jolyn paidalanǵan edik. «Diplommen aýylǵa» degen baǵdarlama boiynsha da úndedik. Biraq muǵalimderdiń ailyǵyn kóterip edik, úderis tabiǵi sipatta júre bastady. Bir jyldyń ishinde ǵana er pedagogterdiń úlesi artqanyn tirkedik. Bul - óte mańyzdy másele. Bizdiń pedagogikada genderlik teńgerimsizdik óte joǵary. Tipti muǵalimdik áiel adamdardyń mamandyǵy degen túsinik qalyptasyp ketken», - degen Dáýren Abaev kez kelgen salada mamandardyń sapasyn ailyqtyń mólsheri aiqyndaitynyn atady.
«Ailyq tómen bolǵandyqtan, er adamdar pedagogika mamandyqtaryna óte sirek baratyn. Al balalar psihologtary pedagogterdiń arasynda genderlik balanstyń bolýy mańyzdy ekenin aityp otyr. Ásirese ul balalardyń psihologiiasy úshin mańyzdy kórinedi. Pedagog er adam olar úshin elikteýge turarlyq úlgi bola alady. Sondyqtan muǵalimderdiń ailyǵyn kóbeitý ámiiannyń ǵana sharýasy emes, júielik shara bolatyn. Siz aityp otyrǵan 600-dei azamattyq qyzmet mamandyqtarynyń bedeli de osy máselege bailanysty. Ailyq neǵurlym joǵary bolsa, oǵan baratyn naǵyz mamandardyń sany da soǵurlym artady» - dedi Prezident ákimshiligi basshysynyń birinshi orynbasary.
