Ekologiialyq uiymdar qaýymdastyǵynyń tóraǵasy Aigúl Soloveva Qazaqstandaǵy karantin talaptarynyń kúsheiýine qatysty pikir bildirdi, dep habarlaidy QazAqparat.
«Meniń oiymsha, karantin talaptaryn qatańdatý – durys. Erteń virýs etek jaisa, qansha ólim ákeletini belgisiz. Búkil álem halqy lokdaýnǵa da, erekshe rejimge de baǵynýǵa májbúr. Meniń oiymsha, biz de solai etýimiz kerek. Óitkeni ózgelerden erekshe emespiz. Almatyda koronavirýstyń ońtústik afrikalyq jáne britandyq shtamdary tabyldy. Olar túrlense, saldary qandai bolatynyn boljai almaimyz», - dedi Aigúl Soloveva agenttik tilshisine telefon arqyly bergen pikirinde.
Ekologiialyq uiymdar qaýymdastyǵynyń basshysy qazir karantin shekteýleri demokratiialyq elderde de qalypty jaǵdaiǵa ainalǵanyn eske saldy.
«Bir qyzyǵy, lokdaýn jariialansa, bári narazylyq bildiredi. Al ólim-jitimniń kóbeigeni týraly «qaraly habarlar» tarasa, taǵy bilikke kiná taǵa bastaidy. «Úkimet qaida qarap otyr», «Arnaiy qyzmetter ne istep júrgen» dep synap-minei bastaidy. Meniń oiymsha, buǵan moiynsuný kerek nemese lokdaýndy álemdik aýqymda oidan shyǵarylǵan dúnie ekenin dáleldeý kerek. Óz basym osylai túsinemin. Sodan keiin zańǵa baǵyný — órkeniettilik pen demakratiialyq qoǵamnyń negizgi kórsetkishi. Kóptegen demokratiialyq elder meiramhanalardy jaýyp tastady. Bári qamalyp otyrǵanda bireýlerdiń túngi klýbtarda serýendep júrýi múmkin degen oi olardyń basyna da kirip shyqpaidy»,-deidi qaýymdastyq tóraǵasy.
Ol keiingi kúnderi aýrýhanalardyń qaita naýqastarǵa tola bastaǵanyna da alańdap otyr.
«Qazir aýrýhanalarǵa barsańyz tósek-oryndar tolyp qalǵan. Al onyń shyǵyny qandai? Túsinemiz, áleýmettik belsendilik tómendep jatyr, sonda da biz buǵan moiynsunýymyz kerek. Jai ǵana úiden shyqpańyzdar. Men ahýaldy kúndelikti baqylap otyramyn, dinamika, kún saiyn ósip barady. Bulai kete berse, shetin jaǵdaiǵa jetýi múmkin. Oǵan jetkizbei úshin lokdaýn degen kerek. Úkimet sonyń qamyn oilastyrýy kerek, al biz azamat retinde sharalarǵa baǵynýymyz kerek», - dep túiindedi Aigúl Soloveva.
