QR Ishki ister ministrligi ishki ister organdarynyń áielder men balalardy zorlyq-zombylyqtan qorǵaý bólimsheleriniń shtat sanyn ulǵaitty. Bul jaiynda QR Prezidentiniń kómekshisi Erlan Qarin Telegram paraqshasynda jazdy, dep habarlaidy "Ult aqparat".
«Osy jyldyń 25 aqpanynda ótken Ulttyq qoǵamdyq senim keńesiniń V otyrysynda QR Prezidenti Qasym-Jomart Toqaev ishki ister organdarynyń áielder men balalardy zorlyq-zombylyqtan qorǵaý jónindegi bólimsheleriniń shtatyn qalpyna keltirý jáne qyzmetin odan ary kúsheitý týraly tapsyrma bergen bolatyn. Bul bólimshe IIM qurylymynda sonaý 1999 jyly ashylǵan edi. Biraq, keiin onyń shtat sany, ásirese, bul salada quqyq buzýshylyq barynsha joǵary bolyp otyrǵan óńirlerde eki esege jýyq qysqarǵan», - deidi Erlan Qarin.
Prezident kómekshisiniń atap ótýinshe, bul máseleni Ulttyq keńes múshesi, tanymal qazaqstandyq sarapshy Gúlmira Ileýova kótergen.
«2021 jyldyń 19 naýryzynda Ishki ister ministriniń buiryǵymen áielder men balalardy zorlyq-zombylyqtan qorǵaý bólimsheleriniń shtat sany ulǵaityldy. Bul sheshim shtattyq birlikterdi ishki bólý esebinen júzege asyryldy. Atap aitqanda, áielder men balalardy zorlyq-zombylyqtan qorǵaý bólimsheleriniń shtat sany 129-ǵa ulǵaidy. Óz kezeginde, kámeletke tolmaǵandar isi jáne balalardy qorǵaý bólimsheleriniń sany eki esege jýyq – 448 birlikke keńeitildi», - dedi ol.
