Almaty Arena sport kesheninde ótken boks keshinde otandasymyz Aidos Erbosynuly WBA International chempiony atandy. Osylaisha ol WBO Global, WBC Asia jáne WBA International belbeýlerin ielendi, dep habarlaidy QazAqparat tilshisi.
Úsh belbeý sarapqa salynǵan jekpe-jekte Aidosqa «Talqandaýshy» (Demolisher) degen atpen tanylǵan namibiialyq boksshy Lýkas Ndafolýma (15-1, 6 KO) qarsylas bolǵan edi. Alǵashqy raýnd qarsylastardyń ańdysa soqqy jumsaýymen bastalǵanymen, sońyna taman Aidos shabýyldy kúsheitip, soqqylaryn daryta aldy. Ekinshi raýnd alma-kezek soqqy almasýmen jalǵasty. Úshinshi raýndta boksshylar teń dárejede óner kórsetti. Shabýylda qorǵanyp, qorǵana júrip judyryqtasty da. Ókinishke qarai raýnd sońynda Aidostyń sol jaq qabaǵy jarylyp, qan saýlady. Abyroi bolǵanda, úzilis kezinde Aidostyń bapkerleri qandy toqtatty.
Osydan keiin qazaq boksshysy ashyq aiqasqa kóship, qorǵanysty umytty. Sonyń saldarynan qarsylasynyń birneshe soqqysyn dóp tidi. Besinshi raýndta tizgindi qaita qolǵa alǵan Aidos qarsylasynyń baýyrynan, búiirinen dál soqqylaryn daryta aldy. Munan keiingi raýndtar da barynsha tartysty ótti. Boksshylar ashyq aiqasqa shyǵyp, bir-birine dál soqqylar jumsai aldy. Degenmen 10 raýndtyń qorytyndysynda tóreshiler sheshimimen Aidos jeńiske jetti.
Jeńimpazdy marapattaý saltanatynda sharshy alańǵa kóterilgen Almaty qalasynyń ákimi Baýyrjan Baibek: «Qazaqtyń batyrlary máńgi bolsyn! Elimiz aman, jurtymyz tynysh, osyndai jeńisterimiz kóp bolsyn. Qazaqstannyń kók bairaǵy jelbirei bersin!»,- degen tilegin jetkizdi.
Al Aidos Erbosynuly búgingi jeńisin ulystyń uly kúni - Naýryz meiramyna arnaitynyn atap ótti.
«Sizderdiń naǵyz jankúier bolǵandaryńyzdy ringte sezindim. Ol maǵan kúsh-qýat berdi. Jekpe-jek qiyndaý boldy. Óitkeni qarsylasym - 16 jekpe-jektiń bireýinde ǵana jeńilgen tájiribeli sportshy», - dedi WBA International chempiony.
Eske sala keteiik, Máskeýdiń «Krylia Sovetov» sport kesheninde ótkizgen sońǵy jekpe-jeginde Aidos belgiialyq Ilias Achergýidi (12-4-1, 6 KO) jeńip, WBO Global belbeýin ielengen bolatyn.
