Almaty Arena سپورت كەشەنٸندە ٶتكەن بوكس كەشٸندە وتانداسىمىز ايدوس ەربوسىنۇلى WBA International چەمپيونى اتاندى. وسىلايشا ول WBO Global, WBC Asia جەنە WBA International بەلبەۋلەرٸن يەلەندٸ, دەپ حابارلايدى قازاقپارات تٸلشٸسٸ.
ٷش بەلبەۋ ساراپقا سالىنعان جەكپە-جەكتە ايدوسقا «تالقانداۋشى» (Demolisher) دەگەن اتپەن تانىلعان ناميبييالىق بوكسشى لۋكاس ندافولۋما (15-1, 6 كو) قارسىلاس بولعان ەدٸ. العاشقى راۋند قارسىلاستاردىڭ اڭدىسا سوققى جۇمساۋىمەن باستالعانىمەن, سوڭىنا تامان ايدوس شابۋىلدى كٷشەيتٸپ, سوققىلارىن دارىتا الدى. ەكٸنشٸ راۋند الما-كەزەك سوققى الماسۋمەن جالعاستى. ٷشٸنشٸ راۋندتا بوكسشىلار تەڭ دەرەجەدە ٶنەر كٶرسەتتٸ. شابۋىلدا قورعانىپ, قورعانا جٷرٸپ جۇدىرىقتاستى دا. ٶكٸنٸشكە قاراي راۋند سوڭىندا ايدوستىڭ سول جاق قاباعى جارىلىپ, قان ساۋلادى. ابىروي بولعاندا, ٷزٸلٸس كەزٸندە ايدوستىڭ باپكەرلەرٸ قاندى توقتاتتى.
وسىدان كەيٸن قازاق بوكسشىسى اشىق ايقاسقا كٶشٸپ, قورعانىستى ۇمىتتى. سونىڭ سالدارىنان قارسىلاسىنىڭ بٸرنەشە سوققىسىن دٶپ تيدٸ. بەسٸنشٸ راۋندتا تٸزگٸندٸ قايتا قولعا العان ايدوس قارسىلاسىنىڭ باۋىرىنان, بٷيٸرٸنەن دەل سوققىلارىن دارىتا الدى. مۇنان كەيٸنگٸ راۋندتار دا بارىنشا تارتىستى ٶتتٸ. بوكسشىلار اشىق ايقاسقا شىعىپ, بٸر-بٸرٸنە دەل سوققىلار جۇمساي الدى. دەگەنمەن 10 راۋندتىڭ قورىتىندىسىندا تٶرەشٸلەر شەشٸمٸمەن ايدوس جەڭٸسكە جەتتٸ.
جەڭٸمپازدى ماراپاتتاۋ سالتاناتىندا شارشى الاڭعا كٶتەرٸلگەن الماتى قالاسىنىڭ ەكٸمٸ باۋىرجان بايبەك: «قازاقتىڭ باتىرلارى مەڭگٸ بولسىن! ەلٸمٸز امان, جۇرتىمىز تىنىش, وسىنداي جەڭٸستەرٸمٸز كٶپ بولسىن. قازاقستاننىڭ كٶك بايراعى جەلبٸرەي بەرسٸن!»,- دەگەن تٸلەگٸن جەتكٸزدٸ.
ال ايدوس ەربوسىنۇلى بٷگٸنگٸ جەڭٸسٸن ۇلىستىڭ ۇلى كٷنٸ - ناۋرىز مەيرامىنا ارنايتىنىن اتاپ ٶتتٸ.
«سٸزدەردٸڭ ناعىز جانكٷيەر بولعاندارىڭىزدى رينگتە سەزٸندٸم. ول ماعان كٷش-قۋات بەردٸ. جەكپە-جەك قيىنداۋ بولدى. ٶيتكەنٸ قارسىلاسىم - 16 جەكپە-جەكتٸڭ بٸرەۋٸندە عانا جەڭٸلگەن تەجٸريبەلٸ سپورتشى», - دەدٸ WBA International چەمپيونى.
ەسكە سالا كەتەيٸك, مەسكەۋدٸڭ «كرىليا سوۆەتوۆ» سپورت كەشەنٸندە ٶتكٸزگەن سوڭعى جەكپە-جەگٸندە ايدوس بەلگييالىق يلياس اچەرگۋيدٸ (12-4-1, 6 كو) جەڭٸپ, WBO Global بەلبەۋٸن يەلەنگەن بولاتىن.
