"Egemen Qazaqstan" gazeti V «Aibyn» respýblikalyq áskeri-patriottyq jastar jiyny týraly pikirler toptamasyn jariialady.
Memlekettik mańyzdy jiyn
Jastar men jasóspirimderdiń áskeri ómirge qyzyǵýshylyǵy jyldan-jylǵa artyp keledi. Osy oraida, «Aibyn» áskeri-patriottyq jiyny óskeleń urpaqty otansúigishtikke tárbieleýge, olardyń bolashaqta Otan qorǵaýǵa ázirlikterin pysyqtaýǵa, jalpy, áskeri salanyń tártibi men jinaqylyǵyna beiimdeýge zor yqpalyn tigizedi.
Elimizdiń egemendigi, ishki turaqtylyǵy bolashaqta osy órimdei jastarǵa senip tapsyrylady. Otan qorǵaý – naǵyz erdiń isi.
Men bul iste mektepterde oqytylatyn alǵashqy áskeri daiyndyq pánderiniń sapasyn arttyrý kerek dep esepteimin. Óitkeni qolda bar derekterge qaraǵanda, oqý oryndarynda bul pán qazir saldyr-salaq júrgizilýde. Sondyqtan alǵashqy áskeri daiyndyqtyń álippesin qyzmettik, ómirlik tájiribesi mol, kezinde joǵary daiarlyqtan ótken eńbek demalysyndaǵy generaldan bastalatyn ofitserlerge tapsyrý qajet dep oilaimyn. Ardagerlerdiń áleýetin paidalanýdan barlyq taraptar da utylmaidy.
Muhtar ALTYNBAEV,
Halyq Qaharmany, Armiia generaly, «Qarýly Kúshterdiń ardagerleri» RQB Ortalyq keńesiniń tóraǵasy
Kún tártibinen túspeitin másele
«Aibyn» áskeri-patriottyq jiyny bizdiń jas ulandarǵa meilinshe qajet jáne olardyń rýhyn kóteretin is-shara dep esepteimin. Bul jiyn jyldan-jylǵa joǵary deńgeide ótýde. Biyl Memleket basshysy, Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaevtyń arnaiy qatysýy atalǵan sharanyń mańyzyn arttyra tústi. Búgin sapta turǵan jas sarbazdar – erteńgi Otan qorǵaýshylar. Sondyqtan da Memleket basshysynyń aitqan sózderin jastar qulaqtaryna quiyp ósip, erteńgi kúni naǵyz erjúrek jaýyngerlerge ainalaryna kámil senemin.
Jalpy, biylǵy «Aibyn» Elbasy jariialaǵan Jastar jylynyń eń mańyzdy sharalarynyń biri dep esepteimin. Halqymyzdyń jadyndaǵy «Erim deitin el bolmasa, elim deitin er qaidan bolsyn» degen qanatty sóz osyndaidan týsa kerek.
Áskeri qatal tártipti, adaldyqty, joldastyq sezimdi osyndai is-sharalardan boiyna sińirip ósken urpaq ómirlik jolynda qandai da bolsyn qiyndyqtardy ońai eńseredi. Sondyqtan da, «Aibyn» – ulttyń qamy, bolashaqtyń baiandy bolýynyń kepili.
Baqtiiar MÁKEN,
Májilis depýtaty, «Bolashaq» qaýymdastyǵy keńesiniń tóraǵasy
Erteńimiz – jastarmen
Ul tárbielei otyryp, jer iesin tárbieleimiz. Qyz tárbielei otyryp, ultty tárbieleitinimiz anyq. Jastardy rýhani kemeldendirý, fizikalyq turǵyda, patriottyq rýhta tárbieleý – ulttyq qundylyqtardyń, ult saýlyǵynyń, kemel keleshektiń kepili bolmaq.
Al jaqsy dástúrge ainalǵan «Aibyn» áskeri-patriottyq jiynyna Qaraǵandy politehnikalyq kolledjiniń «Búrkit» áskeri-patriottyq klýbynan 15 ulan qatysyp jatyr. Bul klýbtyń tárbielenýshilerine Ulttyq ulannyń «Ortalyq» óńirlik qolbasshylyǵy qamqorlyq kórsetedi.
Oraiy kelgende aita ketelik, el qorǵany bolýǵa qabiletti urpaq qalyptastyrý maqsatynda 2002 jyly ásker basshylyǵynyń qoldaýymen orta mektepterde «Jas búrkit» kadet qozǵalysy qurylǵan edi. Daryndy da ozat oqýshylardan jasaqtalǵan kadet synyptarynda, mine, 17 jyldan beri áskeri-patriottyq tárbie jumysy jemisti júrgizilip keledi. Jalpy, eliniń taǵdyryna beijai qaramaityn izbasarlar, jer qorǵany bolar jaýyngerler daiyndaýda Ulttyq ulan óskeleń urpaqqa árdaiym qoldaý kórsetedi.
Qanat BELIaKOV,
polkovnik, Ulttyq ulan «Ortalyq» óńirlik qolbasshylyǵy qolbasshysynyń orynbasary
Tárbieniń biregei alańy
Dástúrge ainalǵan «Aibyn» áskeri-patriottyq jiynynyń ashylýyna Prezidenttiń qatysýy Qaraǵandy jurtshylyǵyn qýantty. Bul – jastardy Otanymyzdyń qorǵaýshysy bolýǵa shaqyratyn biregei alań. Sol sebepti, osyndai is-sharaǵa nazar aýdarý jastarymyzdy jigerlendirip, olarǵa kúsh beredi. Memleket basshysy ózi aityp ketkendei, bizdiń erteńimiz – jastardyń qolynda.
Búgingi jastar óte alǵyr, jalyndy. Olar qoǵamnyń damýyna jáne jańǵyrýyna septigin tigizýde. Sol sebepti jastardyń boiynda otanshyldyq rýhty qalyptastyryp, tárbieleýge airyqsha kóńil bólingeni barlyǵymyz úshin qýanatyn jait. Búginde jastar memleket basqarý isine de aralasyp jatyr. Q.Toqaev ant berý rásiminde aityp ketkendei, Prezidenttik kadrlyq rezervtiń qurylýy olardyń kóńiline medet berip, keleshekke senimdi qadam basýǵa itermeleidi.
Al osyndai is-sharalar arqyly jastarǵa otanshyldyqty, patriottyqty úiretemiz. Otanymyz – basty bailyǵymyz. Ony qorǵaý – ár azamattyń mindeti. Sondyqtan bul qundylyqty jastardyń boiyna erte bastan sińirý kerek.
Qadisha OSPANOVA,
«Nur Otan» partiiasy Qaraǵandy oblysy filialy tóraǵasynyń birinshi orynbasary
Áskerdiń biz úshin máni joǵary
Dýman ÁBDIRAMANOV,
«Kaztsink» JShS ashyq taý-ken jumystary boiynsha bas kenshi, Qaraǵandy oblystyq máslihatynyń depýtaty
