Almatyda kisi qolynan qaza tapqan Aiajan Edilovanyń súiegi jer qoinyna tapsyryldy. Bul týraly "Ne molchi" qorynyń jetekshisi Dina Tańsári habarlady.
"Búgin, 2021 jyldyń 16 sáýirinde Aiajan Edilova jerlendi. Kóńildi, belsendi, tabandy, eńbekqor qyz 20 naýryzǵa qaraǵan túni qylmyskerdiń qurbany boldy. Týystary Aiajannyń denesin myrysh tabytqa salynǵan kúide aldy. Orny tolmas qaza, imandy bolsyn", - dep jazdy Tańsári.
Aita keteiik, 19 naýryzda Almatyda 19 jastaǵy Aiajan Edilova joǵalyp ketti. Ony sońǵy ret jumysta kórgen. Qyzdy izdeý birneshe kúnge sozyldy. Onyń kóz jumǵany 22 naýryzda belgili boldy. Onyń bólshektengen denesi Nurkent yqsham aýdanyndaǵy páterlerdiń birinen tabyldy.
Qylmysqa kúdikti retinde Túrkistan oblysynyń 28 jastaǵy turǵyny ustaldy. Politsiia onyń úiiniń esigin buzyp kirgende kúdikti qolyna pyshaq alyp, óz moinyn tilip úlgergen. Dárigerler ony qutqaryp qaldy.
"Aralarynda janjal shyqqan. Janjaldyń nátijesinde ol qyz balany óltirip, qylmystyń izderin jasyrý maqsatynda onyń denesin bólshektegen. Qylmys asa qatygezdikpen, jaýyzdyqpen jasalǵan", - deidi Almaty qalasy politsiia departamentiniń baspasóz hatshysy Saltanat Ázirbek.
Keiin Aiajan Edilovanyń ózin azaptap óltirgen er adammen birge liftige kirip bara jatqany túsirilgen video jariialandy.
Eger ustalǵan adamnyń kinási dáleldense, ol 15 jyldan 20 jylǵa deiin sottalýy nemese ómir boiyna bas bostandyǵynan aiyrylýy múmkin.
