Semei garnizony áskeri sotynda Aiagózdegi bólimniń rota komandirine qatysty sot isi qaraldy, dep habarlaidy QazAqparat.
QR IIM Shyǵys óńirlik áskeri-tergeý basqarmasynyń málimetine súiensek, aiyptalýshy uzaq ýaqyt boiy óziniń laýazymyn asyra paidalanyp, sarbazdardyń atyna nesie alyp kelgen.
«Tergeý barysynda anyqtalǵandai, rota komandiri Kaspi bank mobildi qosymshasy jáne shaǵyn nesie uiymdary arqyly áskerge shaqyrylǵandarǵa eki million teńgeden astam somaǵa alty nesie resimdetken. Budan bólek, ol 17 sarbazdyń bank kartalaryn tartyp alyp, birneshe ret jalaqylaryn sheship aldy. Ofitser sol aqshanyń barlyǵyn býkmekerlik keńsede bás tigip, utylyp qalǵan», - delingen aqpartta.
Semei garnizony áskeri sotynyń úkimimen aiyptalýshy 3 jyl merzimge bas bostandyǵynan aiyryldy.
