Indýstriia jáne infraqurylymdyq damý ministri Beibit Atamqulov eldegi áýe kompaniialary men olardyń ieligindegi ushaqtardyń sany týraly málimet berdi, dep habarlaidy QazAqparat.
Ministr halyq aldyndaǵy eseptik kezdesýinde áýe kóligindegi baqylaý men qadaǵalaý áli de jetildiriletinin atady.
«Búginde Qazaqstanda 55 áýe kompaniiasy jumys isteidi. Onyń ishinde Eir Astana, Fly Arystan, Skat, Qazaq Air, «Iýjnoe nebo», «Jetisý Avia», «Jezqazǵan Eir» siiaqty 7 kompaniia 75 zamanaýi avialainermen turaqty tasymaldar oryndaidy. Uzaq merzimdi perspektivada bizdiń bul kompaniialar 2031 jylǵa deiin 39 qazirgi zamanǵy áýe kemesin satyp alýdy josparlap otyr», - dedi Beibit Atamqulov.
Vedomstvo basshysy azamattyq aviatsiiany baqylaý jáne qadaǵalaý baǵytynda eýropalyq tásil engizilgenin aitty.
«Túrli pikirtalastar men syndarǵa qaramastan, Qazaqstannyń aviatsiia ákimshiligi óz jumysyn atqaryp, óziniń ómirsheńdigin dáleldedi. Onyń basshylyǵyna táýelsiz ári obektivti baqylaýdy qamtamasyz etetin tájiribeli sheteldik maman tartyldy. Aviakásiporyndardy inspektsiialyq tekserý qorytyndysy boiynsha Bek Air, Sigma Airlines, Jet Airlines, JENIS AIR, Phoenix, Qazaq Helicopters, AZEE AIR, MS air KZ siiaqty 8 aviakompaniianyń qyzmeti toqtatyldy», - dedi ministr.
