Foto: primeminister.kz
Úkimet otyrysynda kún tártibinen tys JEO men jylý jelilerindegi shtattan tys jaǵdailardyń saldaryn joiý jáne olardyń oryn alý máseleleri qaraldy, dep habarlaidy "Ult aqparat" primeminister.kz saityna silteme jasap.
Energetika ministri Almasadam Sátqalievtyń málimdeýinshe, Qazaqstanda aýa raiynyń sýýyna bailanysty energiia kózderi men jylý jelilerinde birqatar tehnologiialyq aqaý oryn aldy. Atap aitqanda, Ridder JEO-sy, Temirtaý 1-MAES-i jáne Ekibastuz JEO-sy jumysynda aqaýlar boldy. Atalǵan nysandar boiynsha temperatýralyq rejim tolyǵymen qalpyna keltirildi.
Sonymen qatar Stepnogorsk, Balqash, Aqtaý jáne Kókshetaý qalalaryndaǵy jylý jelilerindegi tehnologiialyq aqaýlar da jedel jóndeldi. Qazirgi ýaqytta barlyq tutynýshy jylýǵa qosylǵan.
Jylý berý maýsymyna júieli daiyndyq aiasynda respýblikanyń elektr stantsiialarynda 8 energetikalyq blok, 40 qazandyq jáne 42 týrbinaǵa kúrdeli jóndeý júrgizildi. 2 energetikalyq blok, 9 qazandyq jáne 11 týrbina boiynsha jumystar – sońǵy kezeńde. Oǵan qosa 25,3 myń shaqyrym elektr berý jelileri, 564 qosalqy stantsiia jáne 3,5 myń taratý pýnkti kúrdeli jóndeýden ótti.
Óńirler ákimderi Kókshetaý men Stepnogorsk qalalarynda jylý berý maýsymynyń qalai ótip jatqany, Ekibastuz jáne Ridder JEO-laryndaǵy ahýal, Balqash pen Temirtaýdaǵy jylý berý nysandaryn jóndeý, sondai-aq Aqtaýdy jylýmen jabdyqtaý jáne Atyraýdy sýmen jabdyqtaý týraly aqparat berdi.
Premer-Ministr respýbikada kúnniń kúrt sýytyp ketýine bailanysty kommýnaldyq júielerge túsetin júkteme de arta túskenin aitty. Mundai kezde jylý jáne energiia obektilerinde shtattan tys jaǵdailar oryn alatyny málim.
«Tehnologiialyq aqaýlarǵa bailanysty intsidentter bolyp jatyr. Buzylǵan ýchaskelerdi normativtik merzimde qalpyna keltirý boiynsha shuǵyl sharalar qabyldandy», — dedi Álihan Smaiylov.
Úkimet basshysynyń aitýynsha, avariialar bolǵan jaǵdaida barynsha shuǵyl áreket etip, tiisti sharalar qabyldaý kerek.
«Halyqqa naqty jaǵdai týraly, jóndeý jumystary men josparly jumystar týraly der kezinde obektivti ári túsinikti aqparat berý – mańyzdy másele. Áitpese, ótirik aqparat pen feik tarap ketedi», — dedi Premer-Ministr.
Úkimet basshysy óńir ákimdikterine jylý obektileriniń ielerimen birge turaqty jumys isteitin jóndeý brigadalarynyń bolýyn, shuǵyl jóndeý jumystary qajet bolǵan jaǵdaida qosalqy bólshekterdiń ázir turýyn qamtamasyz etýdi tapsyrdy.
Oǵan qosa Álihan Smaiylov «Qazaqstan temir joly» jáne «QazMunaiGaz» ulttyq kompaniialarynan birinshi kezekte jylý stantsiialary men qazandyqtarǵa otynnyń ýaqytyly jetkizilýin qamtamasyz etýdi talap etti.
