Nur-Sultan qalasynyń taýarlar men kórsetiletin qyzmetterdiń sapasy jáne qaýipsizdigin baqylaý departamentiniń mamandary astana mektepterinde oqýshylar sómkesiniń salmaǵyn ólshep júr.
Vedomstvonyń ózi QR Densaýlyq saqtaý ministrligine osyndai usynys bildirgen, dep habarlaidy "Ult aqparat".
Departament basshysy Sádýaqas Baiǵabylovtyń sózine qaraǵanda, aýyr sómke oqýshylardyń belin aýyrtyp, búkir qylýdan bólek, kifoz, lordoz siiaqty aýrýlarǵa shaldyqtyrýy, tipti balalardyń tirek-qimyl apparatyna zardabyn tigizýi múmkin.
S. Baiǵabylov aǵzasy, qańqa-bulshyq et júiesi endi ǵana qalyptasyp kele jatqan jeti jasar balalardyń densaýlyǵyna alańdaýly.
Onyń aitýynsha, oqýlyq toly sómkeniń salmaǵy tórt, keide bes kilogramǵa deiin jetedi. Sondyqtan oqýshy sómkesine qoiylatyn talaptardy qaita qarap, mektepterdiń tekserý paraǵyna qosymsha tarmaq engizý qajet.
Departament basshysy qazirdiń ózinde gigienalyq talaptardyń buzylýyna aiyppul salynatynyn eskertti. Aita keteiik, mundai aiyppuldyń mólsheri 500 myń teńgeden asyp túsedi.
