Sýmen qamtamasyz etý deńgeiin artyrý úshin kórsetkishteri tómen óńirlerge basym negizde qarajat bólinedi. Bul týraly QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat tilshisi.
«Memleket basshysynyń tapsyrmasyna sáikes 2025 jylǵa deiin el halqyn túgeldei sapaly aýyz sýmen qamtamasyz etýimiz qajet. Bul mindet «Qýatty óńirler – el damýynyń draiveri» ulttyq jobasy sheńberinde iske asyrylady», - dedi Beibit Atamqulov Úkimettiń búgingi otyrysynda.
Ministrdiń aitýynsha, 2020 jyly eldegi sýmen jabdyqtaý qyzmetterine qoljetimdilik 94,1% qurady, onyń ishinde: aýyldarda - 90,1%, qalalarda - 97,5 %.
«Jyl sońyna deiin bul kórsetkish aýyldarda – 91,8%, qalalarda – 98% jetýi tiis. Búgingi tańda óńirlerde taza sýǵa qoljetimdilik ártúrli deńgeide. Aýyz sýmen qamtý deńgeii 3 óńirde: Atyraý, Almaty, Qyzylorda oblystarynda joǵary. Jekelegen óńirlerde artta qalý baiqalady. Aýyl halqyn aýyzsýmen qamtý deńgeii 4 óńirde eń tómen. Olar: Qostanai, Shyǵys Qazaqstan, Soltústik Qazaqstan jáne Jambyl oblystary», - dedi ol.
Sýmen qamtamasyz etý deńgeiin artyrý úshin kórsetkishteri tómen óńirlerge basym negizde qarajat bólinedi.
Sondai-aq, «Aýyl - el besigi» arnaiy jobasyna engizilgen aýyldarǵa jáne Óńirlerdi damytýdyń keshendi josparlaryna engizilgen jobalarǵa basymdyq beriledi.
