Aqtóbe oblysynyń politseileri koronavirýs týraly jalǵan aqparat taratqan Badamsha aýylynyń turǵynyn ustady, dep habarlaidy Polisia.kz saity.
Er adam óz úiiniń aýlasynda qorǵanysh kiimderi men betperde kigen adamdar balalar alańynda dezinfektsiia jumystaryn júrgizip jatqanyn kórgen. Ony videoǵa túsirip, ony «Badamsha aýylynda koronavirýs infektsiiasyn juqtyrǵan adam anyqtaldy» degen kommentariimen týystaryna taratqan. 34 jastaǵy er azamat ustalyp, óz kinásyn tolyǵymen moiyndady.
Fakti boiynsha ony ákimshilik jaýapkershilikke tartý máselesi sheshilip jatyr.
«Aqtóbe oblysynyń Politsiia departamenti jalǵan aqparat taratý faktilerin anyqtaý úshin kún saiyn áleýmettik jelilerge monitoring júrgizilip, arandatýshylyq málimetterdi anyqtaý boiynsha turaqty jumys júrgiziletindigin eskertedi. QR Ákimshilik quqyq buzýshylyq týraly kodekstiń 57-babyna sáikes dúlei apat nemese basqa da tótenshe jaǵdailar kezinde jasalǵan ákimshilik quqyq buzýshylyq jaýapkershilikti aýyrlatatyn mán-jaiǵa jatady», - delingen aqparatta.
