Foto: Facebook.com
Aqtóbe oblysynyń Jarly aýylynda qudyqqa túsip ketken qyzdy qutqarmaqshy bolǵan 37 jastaǵy azamat týraly tyń derekter paida boldy, dep habarlaidy Ult.kz.
Marqum Nurbol Berdiǵaliev Aqtóbe oblysynyń Baiǵanin aýdanynan shyqqan bapker. 2021 jyly Jarly aýylynda ashylǵan dene shynyqtyrý ortalyǵyna jumysqa ornalasyp, aýyl balalarynan chempion shyǵaramyn degen armany bolǵan eken. Bapker týraly jazbany jýrnalist Aqyrys Seiitqazy áleýmettik jelidegi paraqshasynda jariialady.
"Osy aýyldan “Aýyl sporty” degen respýblikalyq jobanyń jeńimpazdaryn shyǵaryp úlgerdi. Jobaǵa jaýapty Qulybaevtyń qory da qaiǵyra kóńil aityp jatyr", - dep jazdy jýrnalist.
Aqyrys Seiitqazy oqiǵanyń qalai bolǵanyn jazdy.
"Jarly aýylynda eńbek etip júrgen Nurbol kórshi úidiń 9 jasar qyzyn qudyqtan alyp shyǵamyn dep, ózi de baqilyq boldy. Qudyqtyń beti qańyltyrmen jabylǵan, biraq 3-synyp oqýshysy oinap júrip, baiqamai túsip ketedi. Muny kórgen kórshisi Nurbol qutqarýǵa asyǵady. Birinshi ret túskende tunshyqqanyn aityp, qaita shyqqan dep estidim. Áieli qarsy bolyp, qaita túspeýin ótinse de, ol murnyn oramalmen jaýyp, qyzdy qutqarý úshin qudyqqa ekinshi ret túsedi. Sodan tiri shyqpady. Resmi aqpar boiynsha, kishkentai qyz da, Nurbol da gazǵa tunshyqqan", - dep jazdy ol.
Marqumnyń artynda alty balasy qaldy.
"Nurboldyń erkin kúresten jarystarǵa qatysyp júretinin mektep kezinen estitinmin. Keiin aýyl balalaryn jattyqtyra bastady. Aýylda kúres jaily aitylsa, Nurboldyń aty qosa júretin. Baiǵanindegi erkin kúresti kóteremin dep, ár esikti qaǵyp, shapqylap júretinin dostary únemi aitýshy edi. Nurboldyń qazasy búkil Baiǵanin jurtyn eseńgiretip tastady. Barsha aýyldasqa qaiǵyra kóńil aitamyn", - dep jazdy Aqyrys Seiitqazy.
Osyǵan deiin Aqtóbede qudyqqa túsip ketken bala men eresek adam qaitys bolǵany týraly jazǵan bolatynbyz.
