Jambyl oblysynda turǵyndardyń tabysyn arttyrý jónindegi pilottyq jobanyń nátijeleri joǵary baǵalanýda. QR Aýyl sharýashlyǵy ministrligi onyń jalǵasýyn qoldaýǵa ázir. Bul týraly óńirge saparlap kelgen vedomstvo basshysynyń orynbasary Nurbek Daiyrbekov málimdedi, dep habarlaidy "Ult aqparat".
Aýyl sharýashylyǵy vitse-ministrimen birge oblysqa jaýapty ministrlikterdiń ókilderinen quralǵan delegatsiia kelgen. Qazir olar joba boiynsha ótken jyly atqarylǵan jumystardyń náitijelerin saralap júr. Birneshe aýdanda bolyp, pilottyq jobaǵa engen aýyldardy kórgen. Delegatsiia múshelerin oblys ákimi Berdibek Saparbaev qabyldady.
«Men baǵdarlamaǵa engen aýyldarda birneshe ret boldym. Joba bes baǵyt boiynsha júzege asyryldy. Eń basty maqsatymyz oryndaldy. Ataýly áleýmettik kómek alýshylar sany 32 paiyzǵa azaiyp, qatysýshylardyń ortasha tabysy 2,5 ese ósken. Nátijesiz ózin ózi jumyspen qamtyǵandar sany 35 protsentke azaidy. Úi irgesindegi jerin paidalanatyn turǵyndardyń úlesi 95 protsentke jetti. Mal basynyń sany 45 myńǵa ósti. 11 kooperativ 190 dana aýyl sharýashylyǵy tehnikasyn lizingke aldy», - dep atap ótti Berdibek Saparbaev.
Óńirde sondai-aq, «Alqaptan sórege deiin» jobasy da sátti júzege asqanyn atap ótti aimaq basshysy. Memleketten bólingen 1 mlrd teńge tolyq igerilip, aýyl sharýashylyǵy ónimderin satýda deldaldardyń úlesin azaitýǵa múmkindik berdi. Nátijesinde ónimdi mańdai terin tógip ósirgen sharýalardyń tabysy artty.
«Biyl biz pilottyq jobaǵa 20 aýyldyq okrýgty engizýdi josparlap otyrmyz. Onyń nátijesinde aýyldyq turǵyndardyń tabysyn arttyryp, aýyl sharýashylyǵy ónimin 2,2 ese ósirýdi maqsat etýdemiz. Baǵdarlamanyń basy jaqsy, endi ony aiaǵyna deiin jetkizý kerek. Óitpegen jaǵdaida halyqtyń memlekettik baǵdarlamalarǵa degen senimi azaiady dep sanaimyn»,- dep atap ótti aimaq basshysy.
Aýyl sharýalshylyǵy vitse-ministri Nurbek Dairbekov óńirde atqarylǵan jumystarǵa ásirese, qala men aýdandarda ashylyp jatqan Áleýmettik dúkenderdiń jumysyna joǵary baǵa berdi. Pilottyq jobany jalǵastyrýdy ministrlik qoldaitynyn jetkizdi.
«Sońǵy kúnderi birneshe aýylda boldyq. Oblysta kóp jumys atqarylǵanyna kózimiz jetti. Mundaǵy áleýmettik dúkenderde mańyzdy taýarlardy arzan baǵamen satyp alýǵa bolatyny qýantty. Eger ol dúkenderdiń jelisi keńeietin bolsa, ekonomikalyq effektisi joǵary bolmaq. Pilottyq jobaǵa keler bolsaq, aýyldyqtardyń onyń jalǵasýyn qajet etetini kórinip tur. Salynǵan jylyjailar, sút óńdeý mekemesi jáne taǵy da basqa jobalarǵa jol ashylǵany quptarlyq is. Biz ministrlik tarapynan ony qoldaýǵa daiynbyz»,- dedi Nurbek Daiyrbekov.
