Zaýyttardyń jedel derekterine sáikes maýsym aiynda Qazaqstanda 38 myń tonna qant óndirilgen. Onyń ishinde Taraz qant zaýyty – 18 myń tonna, Kóksý zaýyty – 9 myń tonna, Merki qant zaýyty – 11 myń tonna, dep habarlaidy "Ult aqparat" AShM baspasóz qyzmetine silteme jasap.
"Maýsymda úshinshi elderden bajsyz ákelýge arnalǵan kvota sheńberinde 23,5 myń tonna ónim importtaldy. Ákimdikterdiń derekteri boiynsha aidyń basynda qorlardaǵy kólem 28,9 myń tonnany qurady. Aýyspaly qor shilde aiynyń basynda 27,2 myń tonnany kórsetti.
Zaýyttardyń derekterine sáikes, shildede 37 myń tonna qant óndirý josparlanyp otyr, al onyń importy 39,7 myń tonna bolady dep kútilip otyr.
Buǵan qosa, 11 shildedegi kórsetkish boiynsha respýblikadaǵy qant qory – 26,8 myń tonna" - delingen habarlamada.
Aýyl sharýashylyǵy ministrligi ónimmen qamtamasyz etý úshin 250 myń tonna kóleminde qant pen quraq shikizatyn bajsyz ákelýge kvota bóldi, qalǵan 100 myń tonnany bólýge ótinimder qabyldanyp jatyr. Kvotalardyń qoldanylý merzimi 31 qazanǵa deiin uzartylyp, tórt jumys toby qurylyp, zaýyttar, oblys ákimdikteri, QR QM MKK, «QTJ» UK» AQ sheńberinde qant kólemderin óńirlerge jedel bólý júzege asyrylady. Sondai-aq qant óndirý men jetkizýdiń apta saiynǵy kestesi pysyqtalyp otyrady. Odan bólek óńirlerdiń qantpen qamtamasyz etilýine monitoring júzege asyrylady. Júkti ýaqtyly kedendik resimdeý júrgizilip, toraptyq stantsiialarda turyp qalýdy boldyrmaý maqsatynda qant pen shikizatty tasymaldaý protsesi qadaǵalanabaq.
"Sondai-aq Úkimet otandyq qant naryǵyndaǵy jaǵdaidy turaqtandyrý jónindegi bes jyldyq kezeńge arnalǵan is-sharalar josparyn maquldady. Jospar aiasynda oǵan qant qyzylshasyn egý alańdaryn ulǵaitý, sýarý jelilerin qaita qurý jáne salý, qant zaýyttaryn jańǵyrtý, ishki naryqty qorǵaý, memlekettik qoldaý sharalaryn kórsetý jónindegi is-sharalar kiredi. Sonymen birge, qant qyzylshasyn qaita óńdeýge ótkizýdi sýbsidiialaý normativi ulǵaitylady, quraq shikizatynyń importy kezinde QQS-ty nólge túsirý jáne qyzylsha qantyn óndirýge QQS-ty 70%-ǵa tómendetý jáne quraq qantyna osy jeńildikti taratý boiynsha jeńildiktiń qoldanylý merzimin uzartý qarastyrylyp jatyr" - delingen ministrlik habarlamasynda.
