Pákistan astanasy Islamabadtaǵy Meditsina ǵylymdary institýtynyń ginekologiia bóliminde joiqyn órt bolyp, keminde 15 jańa týǵan náreste qaza tapty, dep habarlaidy ult.kz.
Geo News málimetinshe, órttiń shyǵýyna konditsioner kompressorynyń jarylýy sebep bolýy múmkin. Alaida bul aqparat ázirge aldyn ala boljam retinde qarastyrylyp otyr.
Oqiǵa ornyna órt sóndirýshiler men qutqarýshylar, sondai-aq jedel járdem brigadalary jumyldyryldy. Dárigerler zardap shekkenderge kómek kórsetip, basqa patsientterdiń jaǵdaiyn turaqtandyrýǵa kúsh salǵan.
Qaýipsizdik maqsatynda aýrýhana aýmaǵy qorshaýǵa alynyp, ǵimarat mańyna qosymsha jedel járdem kólikteri jetkizildi.
Qazir quqyq qorǵaý organdary órt pen yqtimal jarylystyń naqty sebebin anyqtap jatyr.
