7 qyrkúiek saǵat 15.00-de Qostanai oblysynyń Áýliekól aýdanyndaǵy tabiǵi órt aýyzdyqtaldy. Bul týraly jedel shtab basshysy, Tótenshe jaǵdailar ministri Iýrii Ilin habarlady, - dep jazady "Ult aqparat" QR TJM jedel shtabyna silteme jasap.
Órt aýmaǵy 43 myń gektardy qurady. Jalyndap janyp jatqan ýchaskeler joq, qaldyq ot oshaqtaryn sóndirý jumystary júrgizilip jatyr. Amanqaraǵai, Lesnoe, Ozernoe jáne Baǵanaly aýyldarynyń aýmaqtarynda qaraýyldaý jumystary uiymdastyryldy.
"Janýdyń saldaryn joiý jumystaryna jumyldyrylǵan kúshter men quraldar azaityldy. Kómek kórsetý úshin Aqmola oblysynyń kúshteri men quraldary, Vostok RMK jeke quramynyń injenerlik tehnikasy jerdi jyrtý jumystarymen ainalysatyn bolady. Sonymen qatar TJM polkiniń jeke quramy komandirlermen birge jáne Qostanai oblysynyń bólimsheleri jumys ornyna oralý týraly sheshim qabyldanǵanǵa deiin oqiǵa ornynda qalady. Qalǵan bólimsheler keshke deiin jumystaryn júrgizip, turaqty jumys oryndaryna oralady", - dedi Iýrii Ilin.
Órtti sóndirýge quramynda TJM, IIM UU, Qostanai qalasyndaǵy akademiiasynyń, Qorǵanys ministrliginiń, JAO jáne oblystyń kommýnaldyq qyzmetteriniń kúshteri men quraldary: 207 birlik tehnika, 5 órt sóndirý poiyzy, jeke quramnan 1785 adam jumyldyrylǵan.
Órt sóndirý bastalǵan sátten beri tikushaqtar áýeden 272 ret sý shashty.
Órt bastalǵaly barlyǵy 2091 adam evakýatsiialandy (3 qyrkúiekte Amanqaraǵai, Ozernoe jáne Lesnoe aýyldarynan- 1841 adam, 5 qyrkúiekte Baǵanaly aýylynan Qazanbasy aýylyna - 250 adam).
Áýliekól orta mektebiniń (16 adam), Áýliekól mektep-internatynyń (1 adam) evakýatsiialaý pýnktinde 17 adam, onyń ishinde 7 bala bar. Evakýtsiialanǵandardyń negizgi bóligi óz úilerine oraldy, qalǵandary týystarynyń úiinde.
TJM jedel jelisi jumys isteidi, TJM men Qostanai oblysynyń TJD psihologtarynyń jumysy uiymdastyryldy. TJM jedel jelisine aqparattyq sipattaǵy 37 qońyraý kelip tústi.
Áýliekól aýdanynyń evakopýnktinde jeti psiholog shuǵyl psihologiialyq kómek kórsetedi. Konsýltativtik kómek 124 adamǵa kórsetildi jáne toptyq jumys formatymen 45 bala qamtyldy.
Sóndirý jumystary jalǵasyp jatyr.
