.jpeg)
«AMANAT» partiiasynyń «Jastar Rýhy» jastar qanaty jasaqtaǵan volonterlik toptar Qostanai oblysynda orman órtinen zardap shekken jáne evakýatsiialanǵan turǵyndarǵa kómek kórsetip, belsendi jumysyn jalǵastyryp jatyr.
«AMANAT» partiiasy «Jastar Rýhy» jastar qanatynyń tóraǵasy Nurjan Jetpisbaev atap ótkendei, Áýliekól aýdanyna elimizdiń túkpir-túkpirinen 300-den astam erikti keldi.
«Volonterlerimiz gýmanitarlyq kómekti qoimalarǵa jaiǵastyrdy. Azyq-túlik pen qajetti zattardy turǵyndardyń úilerine jetkizip berýde. Zardap shekkender men evakýatsiialanǵandarǵa jyly sózimizdi aityp, moraldyq qoldaý kórsetý de mańyzdy. Bul – bizdiń shynaiy janashyrlyǵymyzdy bildirý ǵana emes, sonymen birge olarǵa qiyn sátte kúsh-jiger berý. Sonymen qatar, jastar qalpyna keltirý jumystaryna, órtten keiingi úiindilerdi suryptaýǵa, aýmaqty tazalaýǵa jumyldyrylǵan. Munymen qosa, biz órtten zardap shekpegen, biraq qoldaýdy qajet etetin kópbalaly jáne az qamtylǵan otbasylarǵa da azyq-túlik taratamyz», - dedi N.Jetpisbaev.
Sondai-aq, ol qazir turmystyq tehnika men qurylys materialdary kóbirek kelip jatqanyn aitty.
Volonter Raiymbek Baqytjanov Qostanai oblysyna elordadan keldi. Ol apat týraly esti sala birden erikti retinde barýǵa sheshim qabyldaǵanyn aitty.
«Júk tielgen kólikter saǵat saiyn kelip jatady, uiyqtamai, demalmai jumys isteýge týra keledi. Biraq erikti bolýdyń basty qasieti de osy. Sebebi biz adamdarǵa naqty ispen kómektesemiz. Sondyqtan múmkindigim bola salysymen osynda esh oilanbastan keldim. Biz munda kómek qoldaýymyz qansha qajet bolsa, sonsha ýaqytqa deiin jumys isteimiz», - dedi ol.
Jergilikti turǵyn Amanjol Ahmetov eriktilerge alǵysyn aityp, eń bastysy, elimizde tynyshtyq bolsyn degen tilegin jetkizdi.
«Búkil Qazaqstan halqy bizge kómektesip jatyr. Azyq-túlik tapshylyǵy joq, bizge qajettiniń bárin ákeldi. Bul órt qazaqstandyqtardyń qiyn sátte bir-birine kómektesýge ázir janashyrlyǵyn kórsetti», – dedi ol.
Eske sala keteiik, amanattyqtar úsh kún ishinde zardap shekkenderge 1214 tonna gýmanitarlyq kómek jinady. Partiia filialdary janyndaǵy gýmanitarlyq kómek jinaý pýnktteri elimizdiń barlyq 20 óńirinde jumys isteidi. «AMANAT» partiiasy Ortalyq apparatynyń ujymy da zardap shekkenderge kómek kórsetý qoryna birkúndik jalaqysyn aýdardy. Qazirgi ýaqytta volonterler partiia filialdary janynan ashylǵan gýmanitarlyq kómek jinaý pýnktterinde jumysyn jalǵastyrýda.
