Aýǵanstannyń ońtústigindegi Qandaǵar qalasynda juma namazy kezinde úlken jarylys boldy, dep habarlaidy QazAqparat Reuters saityna silteme jasap.
15 qazan kúni Barga Imam sheiit meshitinde juma namazy kezinde úlken jarylys boldy.
Ortalyq aýrýhananyń aqparatyna sáikes, jeti adam mert bolǵan, taǵy 13 adam jaraqattar alǵan. Osy arada BBC kem degende 16 adamnyń qaza taýyp, 32 adamnyń zardap shekkeni týraly málimdedi.
Qazirgi kezde jarylystyń sebebi belgisiz, alaida ony jankeshti-lańkes jasady degen boljam bar.
Lańkestik toptardyń eshqaisysy jarylys úshin jaýapkershilikti moinyna almady.
Kýágerlerdiń aitýynsha, úsh jarylys bolǵan – basty kirer esikte, ǵusyl alatyn jerde jáne meshittiń ishinde.
Kýágerlerdiń habarlaýynsha, oqiǵa kezinde meshitte adam kóp bolǵan. Ádette juma saiyn meshitke kelýshiler sany artady. Jarylystan keiin oqiǵa ornyna kem degende 15 jedel járdem kóligi jetken.
Sonymen qatar meshitke tálipterdiń arnaiy jasaǵy jiberildi. Olar jaǵdaidy óz baqylaýyna alyp, adamdardan zardap shekkenderge kómek kórsetý úshin qan tapsyrýdy suraǵan.
Ótken juma kúni eldiń soltústigindegi Qundyz qalasyndaǵy sheiit meshitinde juma namazy kezinde jankeshti-lańkes shabýyl jasap, saldarynan 50 adam mert boldy. Ol kezde Islam memleketi lańkestik uiymynyń jergilikti bólimshesi jaýapkeshilikti óz moinyna alǵan bolatyn.
