Juma kúni Aýǵanstannyń soltústiginde Qundyz provintsiiasyndaǵy Seid-Abad sheiitter meshitinde qýatty jarylys bolyp, saldarynan 100 adam qaza tapty jáne ondaǵany jaraqat aldy. Bul týraly QazAqparat TASS-qa silteme jasap habarlaidy.
Aamaj News aqparat agenttiginiń málimetinshe, shabýyl jergilikti ýaqytpen saǵat 13:30-da juma namazǵa adamdar jinalǵanda jasalǵan. Aldyn ala málimetke sáikes, jankeshti lańkes meshittiń ishinde jarylǵysh zatty iske qosqan. Ariana News telearnasynyń aqparatyna sáikes, jergilikti máiithanaǵa kem degende 50 adamnyń denesi jetkizilgen.
Jarylys týraly habarlamany eldegi bilikti jaýlap alǵan «Taliban» radikaldy qozǵalysynyń ókili jáne ýaqytsha Aýǵan úkimetindegi aqparat jáne mádeniet ministriniń orynbasary Zabihýlla Mýdjahid rastady.
«Búgin kúndiz Qundyz provintsiiasynda bizdiń otandastarymyz-sheiitterdiń meshitinde jarylys bolyp, saldarynan adamdar qaza taýyp, jaraqat aldy. Arnaiy jasaq oqiǵa ornyna baryp, tergep jatyr», - dedi ol Twitter-degi paraqshasynda.
Óz kezeginde, mádeniet jónindegi «Taliban» komissiiasynyń múshesi Mohammad Djalal osy áleýmettik jelide terakti «Islam memleketi» ekstremistik uiymynyń tarmaǵy «Horasandaǵy Islam memleketi» tobynyń sodyrlary jasaǵanyn habarlady.
