Dereý shara qoldanbasa, milliondaǵan aýǵan azamaty ash qalady. BUU-nyń Dúniejúzilik azyq-túlik baǵdarlamasy osylai dep málimdedi. Aqparatqa qaraǵanda, shamamen 22,8 mln adam (Aýǵanstan halqynyń jartysy) qazirdiń ózinde azyq-túlik tapshylyǵyna ushyrap otyr, 3,2 milliony – bala.
Britandyq BBC saity Gerat qalasy mańynda bala-shaǵasyn ash qaldyrmas úshin jańa týǵan nárestesin satýǵa májbúr bolǵan kóp balaly otbasy týraly jazdy.
"Úide ne un, ne mai joq. Solai isteýge májbúr boldyq" dedi náresteniń ákesi.
BBC saitynyń jazýynsha, náresteni 500 dollarǵa satqan. Bul aqshaǵa otbasy birneshe ai kún kóre alady. Jańa týǵan náreste júre bastaǵan kezde ony satyp alýshyǵa beredi. Satyp alýshy ony eseigen soń ulyna qosatynyn aitqan. Biraq ýádesinde turatynyna esh kepildik joq.
Aqparat agenttiginiń habarlaýynsha, bul osylai isteýge májbúr bolǵan Aýǵanstandaǵy jalǵyz otbasy emes. “Aýǵanstan aýyr gýmanitarlyq daǵdarysty bastan keshirip otyr. Apat bolaiyn dep tur” dedi BUU Azyq-túlik baǵdarlamasynyń atqarýshy direktory Devid Bizli.
Tamyz aiynda shetel áskeri ketkennen keiin Aýǵanstan biligi “Taliban” (Qazaqstanda tyiym salynǵan) radikaldy qozǵalysynyń qolyna ótken. Álemniń bir de bir memleketi onyń biligin moiyndaǵan joq.
Sonyń saldarynan Aýǵanstan Eýropa elderi, Dúniejúzilik bank pen Halyqaralyq valiýta qorynyń kómeginen qaǵyldy. Shetel qarjysy JIÓ-niń 40 paiyzyna jetken.
Qazir elde azyq-túlik, dári-dármek daǵdarysy ornady. Azyq-túlik quny kúrt ósti. Odan bólek, Aýǵanstanda sońǵy tórt jylda ekinshi ret qýańshylyq ornaǵan. BUU aqparatynsha, sonyń nátijesinde kún saiyn aýǵan otbasylarynyń tek bes paiyzy ǵana toiyp tamaq ishedi.
Qyrkúiekte Jenevadaǵy konferentsiia kezinde halyqaralyq qaýymdastyq aýǵan azamattaryna kómek qolyn sozý úshin milliard dollardan astam qarjylai kómek beretinin aitqan. Bul aqshanyń úshten biri BUU-nyń Azyq-túlik baǵdarlamasyn júzege asyrýǵa jumsalady. Alaida Dúniejúzilik azyq-túlik baǵdarlamasy ázirge qarajattyń tek bir bóligi ǵana túskenin jáne onyń teńiz tamshysyndai áser beretinin aitady.
