Aýǵanstannyń Tájikstandaǵy elshisi Muhammad Zahir Ákbar Panjsher aýmaǵynda 400-den astam adamnyń súiegi kómilgen birneshe jer anyqtalǵanyn málimdedi, dep habarlaidy Azattyq.
"Keshe jerlesterimniń biri tálipter sotsyz jáne tergeýsiz 400-den astam adamdy atyp tastaǵanyn habarlady. Men týyp-ósken aýylda sodyrlar 13 er azamatty óltirip, shuńqyrǵa kómip tastaǵan. Olardyń eshqaisynda qarý bolǵan emes. Bári diqandar edi", - deidi diplomat.
Ol jýrnalisterge birneshe sýretti kórsetip, bul Aýǵanstandy basyp alǵan "Taliban" qozǵalysynyń (Qazaqstanda jáne basqa da kóptegen elde tyiym salynǵan) áskeri qylmystaryn dáleldeidi dedi.
Tájik depýtaty Saidjapar Osmonzoda barlyq materialdardy BUU jáne basqa da halyqaralyq uiymdarǵa jiberýdi usyndy.
8 qazanda "Taliban" qozǵalysynyń Panjsher aimaǵyndaǵy resmi ókili Mavlavi Ogo Mir adamdar jappai kómilgen jer tabylǵanyn, onda Aýǵanstannyń ulttyq qarsylyq maidanynyń úsh jaýyngeriniń denesi bolǵanyn málimdegen.
Qyrkúiek aiynyń basynda "Taliban" qozǵalysy Aýǵanstannyń ulttyq qarsylyq maidany qorǵap jatqan Panjsher qalasyn óz baqylaýyna alǵanyn habarlaǵan.
Aýǵanstanda beibit turǵyndar sotsyz ólim jazasyna tartylyp jatqanyn halyqaralyq uiymdar da habarlap jatyr.
