Braziliianyń Rio-de-Janeiro qalasynda bolǵan tikushaq apaty saldarynan amerikalyq ánshi ári mýzykant Oliver Tree 32 jasynda qaza tapty. Qaiǵyly oqiǵa 14 maýsymda bolǵan. Áýe apaty kezinde eki tikushaq áýede soqtyǵysyp, olardyń biri jerge qulaǵan. Saldarynan borttaǵy alty adamnyń barlyǵy kóz jumdy, dep habarlaidy ult.kz.
Qurbandardyń qatarynda Oliver Tree-den bólek argentinalyq bloger Gaspar “Gaspi” Prim, prodiýserler Lýkas Viniale men Lýkas Britý Shaves, sondai-aq eki ushqysh bolǵan. Oqiǵa kezinde tikushaq avtokólik salonynyń aýmaǵyna qulap, birneshe elektr kóligi órtengen.
Ázirge apattyń naqty sebebi jariialanǵan joq. Braziliia biligi oqiǵaǵa bailanysty jan-jaqty tergeý júrgizip jatyr. Aldyn ala málimet boiynsha, adam faktoryna bailanysty qatelik bolýy múmkin degen boljam qarastyrylýda.
Oliver Tree sońǵy jyldary erekshe sahnalyq obrazymen, ázilge qurylǵan beinebaiandarymen jáne “Alien Boy”, “Life Goes On”, “Miss You” siiaqty hit ánderimen álemge tanylǵan. Apat kezinde ol álemdik gastroldik týr aiasynda Latyn Amerikasynda óner kórsetip júrgen.
Ánshiniń komandasy onyń qazasyn resmi túrde rastady. Áleýmettik jelide jariialanǵan málimdemede Oliver Tree-diń ónerdi qoldaýǵa arnalǵan qaiyrymdylyq qoryn qurýdy ósiet etip ketkeni aityldy. Mýzykanttyń jaqyndary men jankúierleri álemniń túkpir-túkpirinen kóńil aityp, onyń shyǵarmashylyǵy umytylmaitynyn jazyp jatyr.
