Qorǵanys ministri Nurlan Ermekbaev Aqtóbe, Atyraý jáne Mańǵystaý oblystaryna jumys saparymen baryp, ondaǵy áskeri bólimder men mekemelerdi aralaidy, dep habarlaidy "Ult aqparat".
Aqtóbede general-leitenant Nurlan Ermekbaev Áýe qorǵanysy kúshteri áskeri institýtynda oqý-jattyǵý protsesiniń uiymdastyrylýyn tekserdi. Oǵan kafedralardyń oqý-jattyǵý materialdyq bazasy, oqytý synyptarynyń jabdyqtary kórsetildi. Áskeri oqý ornynyń bastyǵy JOO-ny damytýdyń keleshektegi basym baǵyttary, atqarylǵan is-sharalar men aldaǵy josparlar týraly baiandady.
Institýt basshylyǵy ózderi jasap jatqan «Virtýaldy áýe ailaǵynyń» jańa jattyqtyrý keshenin kórsetti. Bul keshen jeke ushaqtar men aviatsiia toptaryn qondyrý kezinde ushýdy basqarýǵa múmkindik beredi. Onyń kómegimen kýrsanttar ushý qaýipsizdigin baqylaý men qamtamasyz etýdiń negizderin zerdeleidi. Keshenniń baǵdarlamalyq jasaqtamasy L-39 ushaǵynyń tórt jattyqtyrý qurylǵysymen jáne Mi-8MT tikushaǵynyń eki simýliatorymen biriktirilgen.
Bul jattyqtyrý qurylǵysyn institýttyń professorlyq-oqytýshylar quramy, al baǵdarlama jasaqtamasyn birinshi kýrstyń kýrsanty Álihan Dáýletuly ázirlegen.
Qorǵanys vedomstvosynyń basshysy áskeri bazanyń obektilerin aralap kórip, bólimshelerdiń jaýyngerlik jáne jumyldyrý ázirliginiń, áskeri daiarlyqtyń jai-kúiine qatysty bólim komandirin tyńdady, merzimdi qyzmettegi áskeri qyzmetshilerdi ornalasýymen, olardyń turmystyq jaǵdaiymen, qarý-jaraq pen áskeri tehnikany saqtalýyn uiymdastyrýmen tanysty.
Qorǵanys ministri osy jumys sapary kezinde Atyraý men Aqtaý garnizondaryna da barýdy josparlap otyr.
