Kegen aýdanyndaǵy Qarqara aýylynda Izteleý Núsipqojaev degen azamat turady. Ony bilikti fermer, baǵban ári gúl ósiretin azamat dep aitýǵa bolady. «Aibol» atty sharýa qojalyǵy jumys isteidi. Joǵary bilimdi agronom sońǵy jyldary ainalysatyn kásipterin ulǵaityp, úiiniń ainalasyn kóz toiatyn dúnielermen kómkergen.
Ol alǵash aýdanda «Bastaý-biznes» baǵdarlamasy boiynsha bilim alyp, arnaiy sertifikat alǵan soń gúl ósiretin jylyjai salýdy qolǵa alǵan. Igilikti isi ońynan bolyp, oblys ákiminiń 1 million teńge grantyna ie boldy. Eki metr tereńdikte qazylǵan jylyjaiynda gúl ósirip, kóktem mezgilinde aýdandyq ákimdik pen birneshe eskertkishtiń aldyn gúlmen toltyrdy. Jalpy, onyń gúlin kóptegen mekeme men mektepter alyp, paidalanyp keledi. Biz Izteleýdei isker, eńbekqor azamattyń gúl ósiretinin burynda jazǵan bolatynbyz. Endi ol úiiniń ekinshi jaǵynan kókónis ósiretin jazdyq jylyjai salypty. Eni 6 metr, uzyndyǵy 20 metr jylyjaida qiiar, qyzanaq ósiredi. Ekeýi de jemis berip tur. Jylyjaidyń janynda qyryqqabat, sábiz, sarymsaq, kartop, taǵy basqalary jaiqala kóz tartady. Izteleýdiń qiiar, qyzanaq, sarymsaqtaryn kórshileri de satyp alady.
– Qarqara aýyldyq okrýgi aýmaǵynan 1,5 gektar jer aldym. Aýyldy, aýdandy qamtityndai úlken jylyjai salýdy josparlap júrmin. Ázir qarajat jaǵynan qinalyp turmyn. Qysy-jazy isteitin jylyjaida qiiar, qyzanaq, kapýsta, qyryqqabat ósirsem degen oiym bar. Onyń shapaǵaty elge tietin edi. Burynnan ainalysyp júrgen sharýalarymnyń bári tájiribe jinaý. Úlken iske daiyndalý, – deidi Izteleý aldaǵy josparlaryn sóz etip.
Ras, aýdanda úlken jylyjai joq. Oǵan bel býyp júrgen azamatqa qalaida kómek, qoldaý kórsetý kerek. Óitkeni, qolǵa alǵan isiniń nátijesi kórinip tur. 10 million teńgedei qarajat kerek eken. Jobasy iske qosylǵan kezde 5 adamdy turaqty jumyspen qamtymaq. Mine, naǵyz agronom!
Onyń syrt jaqta 15 gektar arpasy, 5 gektar kartoby bar. Jerdiń qasietin biletin agronom jigit osyndai jemisti jumystar jasap keledi.
Jalpy, onyń ár kúni eńbekke toly. Aýylda jumys joq deitin jastarǵa úlgi. Izteleý Núsipqojaevtyń zaiyby Turǵan Buqabaeva aǵylshyn tiliniń muǵalimi. Úi sharýasynan qoly qalt etkende agronom jubaiynyń kókónisterin kútýge kómektesedi. Eki ul ósirgen. Kelini, 3 nemeresi bar. Shalǵai aýylda óziniń mamandyǵy boiynsha gúl, kókónis, kartop pen dán ósirip, igiligin kórip kele jatqan azamattyń qoly qýatty, ómiri shýaqty bola bergei!
Qanat BIRJANSAL
