Foto: BAQ.KZ
Aýdandar men oblystyq mańyzy bar qalalardyń ákimderin sailaýǵa 2,2 mlrd teńge bólindi. Bul týraly Ortalyq sailaý komissiiasynyń múshesi Sábila Mustafina aitty, dep habarlaidy QazAqparat agenttigi.
«Bul naýqanǵa respýblikalyq biýdjetten qarajat bólinbeidi. «Sailaý týraly» Konstitýtsiialyq zańnyń 33-babyna sáikes, qarajat jergilikti biýdjetten bólinedi. Búgingi tańda óńirlerdiń máslihattarynyń sheshimimen 2,2 mlrd teńge bólinip otyr», - dedi Sábila Mustafina Ortalyq sailaý komissiiasynyń otyrysynda BAQ ókilderiniń saýalyna orai.
Onyń atap ótýinshe, bul - búginge deiin belgili bolyp otyrǵan soma. Aldaǵy ýaqytta ol ózgerýi de múmkin. Óitkeni, keibir óńirlerdiń aýmaqtyq sailaý komissiiasy máslihattan qosymsha qarajat surap otyr.
Esterińizge sala keteiik, 17 oblystyń máslihaty pilottyq rejimde sailaý ótkizý úshin 45 aýdan men oblystyq mańyzy bar qalalardyń tizbesin bekitti. Onyń ishinde 3 qala jáne 42 aýdan bar. Sailaý 5 qarashada ótedi.
