Antaliia–Ekaterinbýrg baǵytymen ushyp bara jatqan «Aeroflot» ushaǵy jolaýshynyń jaǵdaiy kúrt nasharlaýyna bailanysty Atyraý áýejaiyna shuǵyl qondy. Alaida 41 jastaǵy er adamdy qutqarý múmkin bolmady, dep habarlaidy ult.kz.
Atyraý áýejaiynyń meditsinalyq qyzmet basshysy Bolat Qalievtiń aitýynsha, 25 tamyz saǵat 22:50-de áýejaidyń ortalyq dispetcherlik qyzmetine ushaqtyń shuǵyl qonatyny týraly habar túsken.
Ushaq qonǵanǵa deiin áýejaiǵa reanimatsiialyq jedel járdem brigadasy shaqyrylǵan. Dárigerler bortqa kóterilip, klinikalyq ólim jaǵdaiyndaǵy jolaýshyǵa shuǵyl meditsinalyq kómek kórsetken.
Mamandar defibrilliator qoldanyp, júrek-ókpe reanimatsiiasyn jáne basqa da qajetti sharalardy júrgizgen. Alaida jolaýshynyń ómirin saqtap qalý múmkin bolmaǵan.
Kóliktegi politsiia atalǵan faktini 25 tamyzda tirkep, oqiǵanyń mán-jaiyn anyqtaý úshin tekserý jumystaryn bastaǵan.
«Ólimniń aldyn ala sebebi – jedel júrek jetkiliksizdigi», – dep habarlady politsiia.
Marqumnyń denesi ushaqtan túsirilip, onymen birge bolǵan áiel Atyraýda qalǵan. Qalǵan jolaýshylar otyrǵan ushaq Ekaterinbýrgke qarai baǵyt alǵan.
