Keshe Atyraýdaǵy «Jaiyq-Atyraý» bekire shabaǵyn ósirý zaýytynda bekireden jasandy jolmen 22 kg qara ýyldyryq alyndy, dep habarlaidy QazAqparat.
Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmettiń habarlaýynsha, qara ýyldyryq alynǵan bekireniń salmaǵy – 148 kg. Ony balyqshylar 1 naýryzda Jaiyq ózeninen aýlaǵan.
«Jasandy jolmen alynǵan qara ýyldyryq «Osetr» apparatyna salyndy. Keiin basseinde, sonan soń toǵanda jetiledi. Bekire shabaqtaryn shilde-tamyz ailarynda Jaiyq ózenine, iaǵni tabiǵi ortaǵa jiberý kózdelýde. Al, bekire balyǵy jaqyn arada Kaspii teńizine jiberiledi» - dep habarlady Sáken Dildahmet.
Onyń málimetinshe, jyl basynan beri «Jaiyq-Atyraý» bekire shabaǵyn ósirý zaýytyna bekire tuqymdas balyqtardyń 57 danasy aýlandy. Biyl tabiǵi ortaǵa baǵaly balyqtardyń 75 mln shabaǵyn, sonyń ishinde bekireniń 7 mln shabaǵyn jiberý josparlanǵan.
