Atyraý oblystyq prokýratýrasy bútin bir otbasynyń ólimine qatysty rezonanstyq is boiynsha Sultan Sársemálievtiń burynǵy áieli Aqbaian Muqanǵalievaǵa qatysty qylmystyq istiń toqtatylǵanyn málimdedi, dep habarlaidy ult.kz.
Oblys prokýrorynyń kómekshisi Aisulý Súleimenniń aitýynsha, tergeý barysynda Aqbaian Muqanǵalievanyń burynǵy jubaiy jasaǵan asa aýyr qylmysty jasyrǵanyn rastaityn jetkilikti dálelder anyqtalmaǵan. Osyǵan bailanysty oǵan qatysty qylmystyq is toqtatylǵan.
Eske salaiyq, ótken jyly Sultan Sársemáliev pen Aqbaian Muqanǵalieva Indoneziiadaǵy Lombok aralynyń Senarý aýylynda ustalǵannan keiin ekeýine de «Adam óltirý» baby boiynsha qylmystyq is qozǵalǵan bolatyn.
Keiin tergeý barysynda Aqbaian Muqanǵalievaǵa taǵylǵan adam óltirý aiyby qylmys quramynyń bolmaýyna bailanysty alynyp tastaldy. Alaida quqyq qorǵaý organdary onyń burynǵy jubaiynyń qylmysyn jasyrýy múmkin degen kúdikpen isti bólek óndiriske shyǵaryp, tergeýdi jalǵastyrǵan edi. Tergeý nátijesinde bul kúdik te rastalmai, is toqtatyldy.
Prokýratýranyń málimetinshe, Almatyda júrgizilgen keshendi statsionarlyq sot-psihologiialyq-ppsihiatriialyq saraptama qorytyndysy boiynsha Aqbaian Muqanǵalievaǵa dinamikalyq baqylaý júrgizý jáne qosymsha diagnostika qajet dep tanylǵan. Qazirgi ýaqytta ol tiisti em qabyldap jatyr.
Al Sultan Sársemálievke qatysty sot protsesi aiaqtalýǵa jaqyn. Alǵashynda 7 shildege belgilengen jaryssóz sot ǵimaratyndaǵy elektr qýatynyń óshýine bailanysty keiinge shegerilip, 9 shilde kúni saǵat 11:00-ge josparlandy.
