Atyraýda joǵalǵan malyn izdegen jylqyshyny óltirgender sottaldy, dep habarlaidy "Ult aqparat".
Buǵan deiin Atyraý oblysynyń politseileri iz-túzsiz joǵalyp ketken jylqyshyny óltirgen kúdiktini ustap, qoǵamda daý týǵyzǵan qylmysty ashqanyn habarlaǵan edik.
Jaqynda Atyraý oblysynyń qylmystyq ister jónindegi mamandandyrylǵan aýdanaralyq sotynyń úkimimen QR Qylmystyq kodeksiniń 99-baby 1-bóligimen (adam óltirý) T., al, atalǵan kodekstiń 432-babymen (qylmysty jasyryp qalý) M., Q. kináli dep tanyldy.
Sot barysynda tómendegi mán-jailar anyqtalǵan.
«2020 jyly 6 qyrkúiekte saǵat 19.00 shamasynda jábirlenýshi N. sottalýshy M.-nyń ieligindegi mal sharýashylyǵyna mototsikilmen joǵalyp ketken qulyndaryn izdep kelgen. Ol aýlada turǵan eki qulyndy kórip, óziniki ekenin aitqan. Sottalýshy T. olardy berýden bas tartqan. Sodan jábirlenýshi ketip qalyp, kóp uzamai bir úiir jylqysyn alyp kelgen kezde qora mańynda júrgen basqa jylqylar qasha jónelgen. Sol kezde T. sol jylqylardy qaiyryp kelýge sottalýshy K.-ni avtokóligimen jibergen.
Jábirlenýshi N. eki qulyn qamalyp turǵan aýlany ashýǵa árekettengen. T. onyń áreketine ashýlanyp, ony iterip jiberip, tóbelesken. T. ashýlanyp, jábirlenýshini uryp-soǵyp, ańshy myltyǵymen bir ret atqan. T. bul oǵy jábirlenýshige timei qalǵanyn baiqap, oǵan jaqyndap kelip, júrek tusynan qaita atqan. N. sol jerde birden qaza bolǵan», - dep habarlady sottyń baspasóz qyzmeti.
Keiin anyqtalǵandai, sottalýshy T. qos aýyzdy myltyǵyn tyǵyp tastap, atylǵan gilzalardy jáne jábirlenýshiniń uialy telefonyn órtep jibergen. Kóp uzamai oqiǵa ornyna kelgen Q.-ǵa sottalýshy T. jábirlenýshini óltirip tastaǵanyn aitqan. Ekeýi múrdeni kólikke salyp, ony jasyrý úshin sol mańaidaǵy tereń qudyqqa tastap jibergen. Sottalýshy Q. qylmys izin, asa aýyr qylmysty jasyryp qalǵan.
Sodan keiin sottalýshy Q. jolshybai ákesi sottalýshy M.-ny kezdestirip, oǵan sottalýshy T. jábirlenýshini óltirip tastaǵanyn aitqan. Sottalýshy M. jábirlenýshi N.-nyń motokóligin óziniń basqarýyndaǵy «Kamaz-5511» avtokóligine tiep, oqiǵa ornynan basqa jerge aparyp tastaǵan.
Sottalýshylardyń qylmysynyń saldarynan jábirlenýshiniń otbasy N.-nyń múrdesin 9 kún boiy taba almaǵan.
«Basty sot talqylaýynda sottalýshylardyń kinási jábirlenýshilerdiń, kýálardyń jaýaptarymen, múrdeni tabý hattamasymen, saraptama qorytyndylarymen, beinejazbalarmen dálelin tapty. Sot T.-nyń buryn adam óltirgeni úshin sottalyp, sol úkimmen taǵaiyndalǵan 17 jyl merzimin tolyq ótelmegenin eskerip, oǵan túpkilikti 15 jyl 10 ai bas bostandyǵynan aiyrý jazasyn taǵaiyndada. Alǵashqy 3 jylyn túrmede óteýdi belgiledi. Sottalýshy M.-nyń jazasyn jeńildetetin, aýyrlatatyn mán-jailardy anyqtamai M.-ǵa 5 jyl, Q.-ǵa 4 jyl bas bostandyǵynan aiyrý jazasyn taǵaiyndady» -dep habarlady sottyń baspasóz qyzmeti.
Sot úkimi zańdy kúshine engen joq.
