Atyraýda probatsiia qyzmetiniń inspektoryna para retinde bekire tuqymdas balyq bermek bolǵan azamat 2 jyl 1 aiǵa sottaldy, dep habarlaidy "Ult aqparat".
Atyraý oblysy boiynsha qylmystyq-atqarý júiesi departamenti baspasóz qyzmetinen málim etkendei, byltyr Isatai aýdandyq sotynyń úkimimen 32 jastaǵy azamat Qylmystyq Kodekstiń 190-babymen kináli dep tanylyp, oǵan 1 jyl merzimge bas bostandyǵyn shekteý jazasy taǵaiyndalǵan edi.
Soǵan bailanysty sottalǵan azamat aiyna 2 ret probatsiia qyzmetine kelip, tirkelip turýy tiis bolatyn. Alaida, bul talapty oryndamaǵan.
«Sot úkimimen taǵaiyndalǵan májbúrli eńbekti oryndaýǵa qasaqana shyqpady. Atyraý qalasyndaǵy meken-jaiyn teksergen kezde, sottalǵan azamat úiinde bolmady. Keiin sottalǵan azamatqa jazasyn óteýden qasaqana jaltarǵany úshin «eskertý» berilgen», -dep habarlady departamenttiń baspasóz qyzmeti.
Osyndai zańbuzýshylyqtan soń óziniń túrmege qamalýy múmkin ekenin túsingen sottalǵan azamat probatsiia qyzmetkerine para berýge oqtalǵan.
Aram oiyn júzege asyrý maqsatynda bekire tuqymdas balyq satyp alyp, probatsiia qyzmetkerine bermek bolǵan kezde ustaldy.
«Probatsiia qyzmetkeriniń inspektory sottalǵan azamattyń aram oiyn basshylyqqa habarlady. Osylaisha, departament qyzmetkerleri jemqorlyq deregine nóldik tózimmen qaraityn taǵy bir márte dáleldedi», - dep málim etti baspasóz qyzmetinen.
Sot úkimimen kináli azamat QR Qylmystyq Kodeksiniń 367-babymen kináli dep tanylyp, oǵan 2 jyl 1 ai merzimge bas bostandyǵynan aiyrý jazasy taǵaiyndaldy.
Jaza óteý orny qylmystyq-atqarý júiesiniń ortasha qaýipsiz mekemesi bolyp belgilenli.
Eske sala ketelik, budan buryn Atyraýda jeńgetailyqpen ainalysqan áiel túrmege qamalǵanyn jazǵan bolatynbyz.
