© Photo : Pexels
Atyraý oblystyq perinataldyq ortalyǵy direktorynyń mindetin atqarǵan Qazbek Ermaǵambetov óz erkimen qyzmetinen ketti.
Jumystan ketýine osy meditsinalyq mekeme qabyrǵasynda jańa týǵan náresteniń edenge qulap, jaraqat alǵan oqiǵa sebep boldy, dep habarlady Sputnik Qazaqstan agenttigi "Aq Jaiyq" basylymyna silteme jasap.
"Ol basshylyq qyzmetten ketýge ótinish jazdy, biraq perzenthanada jumys isteýin jalǵastyrady", – dedi oblystyq densaýlyq saqtaý basshysynyń orynbasary Janar Sadýova.
Vedomstvo málimetinshe, densaýlyq saqtaý basqarmasy janynan qurylǵan jumys komissiiasynyń tergeý nátijeleri boiynsha dárigerler men kezekshi meditsina qyzmetkerlerine qatysty tártiptik shara qabyldandy.
Eske salsaq, sábi 8 maýsym kúni dúniege keldi. Kelesi kún jańa týǵan náresteniń anasy rentgennen ótýge jiberildi. Palatada sábilerge qaraý úshin jańa bosanǵan áiel qaldy.
Bala qatty jylai bastaǵanda, áiel ony qolyna alyp, tynyshtandyrýǵa tyrysty, biraq ózin nashar sezine bastady.
Ol medbikeler men dárigerlerdi kómekke shaqyrǵanymen, eshkim kelmedi. Áiel balany qolynda ustai almai, ony edenge qulatyp aldy.
Oblystyq densaýlyq saqtaý basqarmasy balanyń jansaqtaý bólimine jiberilgenin, tekseristen ótkizilip, ÝDZ men KT jasalǵanyn habarlady.
"Bala men ana áli kúnge deiin ortalyqta, biraq endi reanimatsiiada emes, jańa týǵan náresteler patologiiasy bóliminde jatyr. Sábidiń gipoksiialyq ishemiialyq zaqymdanýy, qulaýmen emes, júktilik jáne bosaný úderisimen bailanysty", – dep atap ótti Janar Sadýova
