Atyraýda mektep oqýshysy 7,5 jylǵa bas bostandyǵynan aiyryldy, dep habarlaidy QazAqparat.
Atyraý oblystyq prokýratýrasy baspasóz qyzmetiniń málimetinshe, mektep oqýshysy psihotroptyq zattardy saqtaý, tasymldaýǵa qatysty aiyppen sottalǵan.
Biylǵy jyl basynan beri kámelet jasyna tolmaǵan 20 oqýshy qylmystyq quqyq buzýshylyq jasaǵany anyqtalyp otyr. Onyń ishinde 13 aýyrlyǵy ortasha, 7 aýyr qylmys bar.
«Mysaly, kámelet jasyna tolmaǵan oqýshy K. Telegram internet-arnasynan jumys tájiribesi joq bolsa da, jalaqysy joǵary jaiaý kýrer qajet ekeni týraly habarlandyrýdy tapqan. Ol osy habarlandyrýǵa qyzyǵýshylyq tanytqan. Kýrerdiń jumysyna psihotroptyq zattardy jasyryn oryndarǵa jetkizý kiretinin bile tura, materialdyq turǵydan tez baiý maqsatyn kózdegen. Onyń asa iri mólsherdegi esirtki, psihotroptyq zattardy, sol tektesterdi ótkizý maqsatynda saqtaý, tasymaldaý, ótkizýge baǵyttalǵan elektrondyq aqparattyq resýrstardy paidalaný arqyly qylmystyq nieti anyqtalǵan. Nátijesinde oqýshy K. 7 jyl 6 ai merzimge bas bostandyǵynan aiyrý jazasyna sottaldy», - dep habarlady oblystyq prokýratýranyń baspasóz qyzmeti.
Osyǵan bailanysty qadaǵalaý vedomstvosynyń qyzmetkerleri ata-analarǵa balalardyń internet jelisinde otyrýyn qatań baqylaýdy usynady.
