Atyraý halyqaralyq áýejaiy alańynda qazaqtyń tuńǵysh ushqysh qyzy, Halyq qaharmany Hiýaz Dospanovaǵa arnalǵan eskertkish ashyldy, – dep habarlaidy "Ult aqparat".
1922 jyldyń 15 mamyrynda Atyraý oblysynda dúniege kelgen Hiýaz - Ekinshi dúniejúzilik soǵysta erligimen tanylǵan, al soǵystan keiin qairatkerligimen daralanǵan qazaqtyń qaharman qyzy. Onyń erligine bas igen jerlesteri áýejai aldynda batyrǵa arnalǵan eskertkish ornatý týraly bastama kótergen bolatyn.
Qazaqtyń tuńǵysh ushqysh qyzyna arnalǵan eskertkishtiń saltanatty ashylýyna Atyraý oblysynyń ákimi Nurlan Noǵaev pen elimizdiń ár óńirinen kelgen ziialy qaýym ókilderi qatysty. Sondai-aq, eskertkishtiń ornatylýyna bastamashy bolǵandardyń biregeii - «Aiqyn» gazetiniń Atyraý oblysy boiynsha menshikti tilshisi Tursyn Qalimova men batyrdyń baýyry, jerlesteri keldi.
«El basyna kún týǵan sátte er azamattarmen birge sapqa turdy. Mánshúk, Áliia, Hiýaz. Eshkim olardy mindettemedi. Júrek qalaýymen eldiń bolashaǵy úshin óz ómirin qurban etti. Qazirgi tańda Elbasynyń tapsyrmasymen eldiń damý strategiiasynda kórsetilgen mejelerdiń biregeii – áiel qaýymyna úlken qurmet kórsetý. Sondyqtan da búgingi saltanatty shara barsha analarymyzǵa, qazaq qyzdaryna sonyń ishinde biregeii - Hiýaz Dospanovaǵa qurmet bolyp tabylady», – dedi Atyraý oblysynyń ákimi Nurlan Noǵaev. Atyraý Halyqaralyq áýejaiyna ornalasqan eskertkishtiń biiktigi – 2 metr 30 santimetr. Qoladan quiylǵan eskertkishte Hiýaz Dospanovanyń soǵysqa attanǵan boijetken qalpy saqtalǵan.
