Atyraý oblysynda karantindik rejim shekteýlerin buzǵan 1042 derek tirkeldi. Solardyń arasynda kóp adamnyń basyn qosyp quda shaqyryp, kelin túsirgender anyqtaldy, dep habarlaidy "Ult aqparat".
Oblystyq politsiia departamentiniń bastyǵy, politsiia polkovnigi Qamza Úmbetqalievtiń málimetinshe, Atyraý qalasynda 24 shildede úiinde kóp adamdy jinap, jiyn-toi, januialyq shara ótkizgen 5 otbasy anyqtalǵan. Sol kúni saǵat 19:00 shamasynda Balaýsa yqshamaýdanynda 80 adam qatysqan qudalyq, al, saǵat 23:10-da Tasqala aýylynda bir otbasynyń kelin túsirý toiy áshkerelengen.
«Sondai-aq, tekserý kezinde belgilengen shekteýlerdi oryndamaǵan birneshe dúken mobildik toptardyń nazaryna ilikti. Máselen, Vokzal mańy-5 yqshamaýdanynda ornalasqan «Alkomarket», Tomarly aýylyndaǵy «Fariza» dúkeni saǵat 21:00 keiin jumys istep tursa, Bereke kentindegi, Shirina, Aq Jaiyq eldi mekenderindegi azyq-túlik dúkenderiniń satýshylary tutynýshylarǵa meditsinalyq maskasyz, qolǵapsyz qyzmet kórsetken.
Politseiler reidtik shara kezinde Balyqshy kentinde kólik jýý ornyn, Vokzal mańy-3-A yqshamaýdanynda «Kýry gril» dúńgirsheginiń, Baimuhanov kóshesinde «Donerstan» qoǵamdyq tamaqtaný ornynyń karantin talaptaryn buzǵanyn anyqtady» -dedi departament bastyǵy Qamza Úmbetqaliev.
Onyń aitýynsha, karantin rejimin buzýdyń barlyq deregi boiynsha jinaqtalǵan is-qujattar Atyraý qalalyq taýarlar men qyzmetterdiń sapasy men qaýipsizdigin baqylaý basqarmasyna joldandy.
