Foto: azattyq-ruhy.kz
Atyraýda qabaǵan it talaǵan 8 jasar balaǵa búgin taǵy bir ota jasalady. Qazir naýqas oblystyq balalar aýrýhanasynyń jansaqtaý bóliminde jatyr, dep habarlaidy QazAqparat.
Atyraý oblystyq balalar aýrýhanasy travmatologiia bóliminiń meńgerýshisi Sergei Hvannyń aitýynsha, keshe, 15 aqpanda emdeý ornyna it talaǵan 2 bala túsken.
Onyń birine qutyrýǵa qarsy vaktsina egilip, alǵashqy meditsinalyq kómek kórsetilgen. Keiin úiine jiberilgen.
«Al, 8 jasar bala basy men aiaǵynda jaraqaty bar. Qazir ol jansaqtaý bóliminde aýyr jaǵdaida jatyr. Dárigerler naýqastyń jaraqatyna hirýrgiialyq tazalaý em-domyn júrgizdi. Keiin naýqas jansaqtaý bólimine jatqyzyldy. Naýqasqa antirabiialyq vaktsinalar salynyp, antibiotikalyq terapiia bastaldy. Búgin naýqas balaǵa taǵy bir ota jasaý josparlanyp otyr. Aldaǵy ýaqytta naýqasqa birneshe ret hirýrgiialyq em-dom júrgizý qajettigi týyndaidy», - dep habarlady Sergei Hvan.
Onyń málimetine súiensek, byltyr kóshede júrgen buralqy itten 462 bala zardap shekken.
Al, biylǵy jyldyń basynan beri aýrýhananyń dárigerlerine it qapqan 32 bala júgingen. Zardap shekken balalar ár túrli dene jaraqatyn alǵan.
«Qys mezgilinde kóshe júrgende óte saq bolý kerek. Óitkeni, qazir kósheden azyq tappai júrgen it kóp. Buralqy itter ash bolǵan soń adamdarǵa shabýyl jasaidy. Ásirese, jas balalardy talap, olardyń ómirine qaýip týdyryp otyr», -deidi dáriger Sergei Hvan.
