Atyraý veterinarlary it atylǵany jóninde jalǵan qujatpen kásipkerge qarjy aýdarǵan, dep habarlaidy QazAqparat.
Atyraý qalasynyń prokýratýrasy anyqtaǵandai, veterinariia organdary it atylǵany jóninde jalǵan qujattar usynǵan. Jalǵan qujat arqyly kásipkerge biýdjetten qarajatyn aýdarý faktisine bailanysty tiisti qadaǵalaý aktisi engizilgen.
Biýdjetke keltirilgen zalal tolyqtai ótelip, jaýapty tulǵalar qatań tártiptik jaýapqa tartylǵan.
«Sońǵy kezde Atyraý qalasynda itterdiń adamdarǵa, ásirese, kámeletke tolmaǵandarǵa shabýyldaýy jiiledi. Biylǵy jyl basynan 112 adamdy it qabý deregi tirkeldi. Onyń ishinde kámeletke tolmaǵan 70 jasóspirim bar. Osyǵan bailanysty qala prokýratýrasy ýákiletti organdardyń tarapynan buralqy itterdi aýlaý baǵytyndaǵy jumystyń nátijesizdigine, «Janýarlarǵa jaýapkershilikpen qaraý týraly» Zańynyń tiisti oryndalmaýyna bailanysty usynys engizdi. Sonyń nátijesinde prokýratýra, politsiia jáne jergilikti atqarýshy organdar qyzmetkerlerinen arnaiy mobildi top qurylyp, keshendi sharalar jospary bekitildi», - dedi qalalyq prokýratýradan.
Alaida, qabyldanǵan sharalarǵa qaramastan, adamdardy it qaýyp alý deregi áli de tyiylǵan joq. Sol sebepten, prokýratýra ata-analarǵa balalaryn qoǵamdyq oryndarda erekshe baqylaýǵa alý qajettigin eskertip otyr.
Al Atyraý qalasynyń prokýrory janýarlardy qorǵaý salasyndaǵy zańnamanyń saqtalýyn, onyń ishinde buralqy itterdi aýlaý máselesin jeke baqylaýyna aldy.
