Atyraý oblysynda Resei investorlary 3,6 mlrd teńgeniń jobalaryn iske asyrady, dep habarlaidy "Ult aqparat".
Atyraý oblysynyń ákimi Mahambet Dosmuhambetovpen kezdesken reseilik investorlar toqyma polipropilen jáne geosintetika óndirý tsehyna qatysty quny shamamen 3,6 mlrd teńgeni quraityn eki jobany júzege asyrýdy kózdep otyr.
«Elimizde investitsiialyq ahýaldy jaqsartý úshin quqyqtyq turǵydan aýqymdy jumys atqarylyp keledi. Biz de óńirdiń investitsiialyq múmkindigin arttyrýǵa qolaily jaǵdaidy qarastyrýdamyz. Óitkeni, óndiris qai kezeńde de aimaqtyń áleýmettik-ekonomikalyq damýyna oń yqpalyn tigizedi. Sondyqtan, Atyraýdyń damýyna yqpala etetin investitsiialyq jobalardy qoldaýǵa daiynbyz», - dedi oblys ákimi Mahambet Dosmuhambetov.
Reseilik «ÝltraStab» JShQ-nyń kommertsiialyq direktory O.Kostylevtiń aitýynsha, qazir jobanyń birinshi kezeńi úshin eki sheteldik stanok satyp alynǵan. Sondai-aq, óndiristik jabdyqtarǵa tapsyrys berilgen. Jobanyń tehnikalyq-ekonomikalyq negizdemesi ázirlengen.
«Jylyna 3 mln sharshy metr geosintetika óndirý tsehyna 38 adamdy turaqty jumyspen qamtý kózdeldi. Al, ekstrýziondyq geosintetika óndirý tsehyna 44 adam turaqty jumysqa ornalasady. Onyń qýaty jylyna – 5 mln sharshy metr. Bul tsehatr jyl sońyna deiin iske qosylyp, ónim shyǵara bastaidy», - deidi O.Kostylev.
Atalǵan jobalarǵa shikizat shetelden tasymaldanady. Keiin shikizatty Atyraýdaǵy KPI kompaniiasy iske asyryp jatqan integratsiialanǵan gaz-himiia kesheninen alý josparlanǵan.
Resei investorlary qurylysqa qajetti san túrli daiyn ónimderdi shyǵarýdy kózdep otyr. Onyń ishinde avtokólik jáne temirjol qurylysyna, ónerkásiptik qaldyqtardy saqtaý men jaǵalaýdy nyǵaitýǵa qoldanylatyn materialdar bar.
