Atyraýda erlikpen qaza tapqan politsiia serjanty Shalqar Aqymǵaliev memlekettik nagradaǵa usynyldy, dep habarlaidy IIM baspasóz qyzmeti.
«Shalqar Aqymǵaliev jasaǵan erligi úshin memlekettik nagradaǵa usynyldy», - dep habarlady vedomstvonyń baspasóz qyzmetinen.
Eske sala ketsek, Ishki ister ministri Erlan Turǵymbaevtyń tapsyrmasy boiynsha búginde atyraýlyq politsiia serjanty Shalqar Aqymǵalievti este qaldyrý sharalary politsiianyń barlyq bólinisterinde jan-jaqty júrgizilip jatqany habarlanǵan edi. Óńirlik politsiia departamentterinde patriottyq tárbie saǵattary ótkizilýde, sonyń aiasynda batyr týraly beinerolikter túsirý jumystary uiymdastyrylyp, qyzmetkerler Shalqar Aqymǵalievke jyr joldary men mýzykalyq shyǵarmalaryn arnap jatyr.
«IIM qaza tapqan batyrlardyń otbasyn qaraýsyz qaldyrmaidy», - degen bolatyn Ishki ister ministri Erlan Turǵymbaev.
Aita ketken jón, biylǵy jylǵy 21 naýryzda Atyraý qalasynda patrýldik ekipaj quramynda júrgen politsiia serjanty Shalqar Aqymǵaliev kópirden Jaiyq ózenine sekirgen qyz jaily habarlama alǵan boida oilanbastan muzdy sýǵa qirip ketti. Sóitip qyzdyń ómirin ajaldan arashalap qalǵan edi. Alaida, ózi qatty aǵynnyń ishinde arpalysyp júrip, kóz jumdy.
Shalqar Aǵymǵaliev 1994 jyly 1 sáýirde dúniege kelgen. Atyraý oblysy Inder aýdanynyń týmasy. Ol kóp balaly otbasynyń jalǵyz asyraýshysy edi. Otbasyn quryp úlgermegen. Politsiia qatarynda qyzmet atqaryp júrgenine 5 jyldan asqan. Jalpy, Táýelsizdik alǵan jyldardan beri 2264 politsiia qyzmetkeri qaza tapsa, sonyń 785-i qyzmettik boryshyn óteý kezinde, 73-i qaýipti qylmyskerdi ustaý operatsiiasy barysynda erlikpen jan qidy. Sondai-aq 2419 politsiia qyzmetkeri jaraqattanǵan. Sonyń ishinde 899-y qylmyskerdi ustaý barysynda jaralanǵan.
