Atyraý qalasynda erekshe balanyń anasy psihologiialyq-pedagogikalyq túzetý kabinetinde ulyna jaraqat salynǵanyn aityp, quzyrly organdardan oqiǵanyń mán-jaiyn anyqtaýdy talap etti, dep habarlaidy ult.kz.
Áieldiń aitýynsha, onyń uly 17 maýsym kúni saǵat 14:00-den 16:20-ǵa deiin sabaqqa qatysqan. Balasyn alyp ketýge kelgen kezde ol ulynyń bileginiń ishki jaǵynda tyrnalǵan izder men kógergen belgilerdi baiqaǵan.
Belgili bolǵandai, 2 jas 10 ailyq balaǵa psihikalyq jáne sóileý damýynyń tejelýi (ZPRR) jáne nazar tapshylyǵy men giperaktivtilik sindromy diagnozy qoiylǵan.
Mekeme qyzmetkerleriniń túsindirýinshe, sońǵy sabaqty ótkizýi tiis maman jumystan erterek ketkendikten, bala oiyn bólmesinde tárbieshiniń qaraýynda qalǵan. Keiin ol dálizge shyǵyp, edenge jatqan. Qyzmetkerlerdiń aitýynsha, tárbieshi balany qaitadan bólmege kirgizý úshin qolynan ustaǵan.
Alaida bul túsinikteme balanyń anasyn qanaǵattandyrmaǵan. Onyń sózinshe, eń úlken másele – ulynyń sóilemeitindigi jáne bolǵan oqiǵany óz betinshe túsindirip bere almaityndyǵy.
Oqiǵa bolǵan kúni berilgen travmatologtyń meditsinalyq anyqtamasyna sáikes, balaǵa sol jaq bilektiń jumsaq tinderiniń soǵylýy diagnozy qoiylǵan. Sondai-aq qujatta bilektiń ishki bóliginde jergilikti qan quiylý belgileri tirkelgen.
Qazirgi ýaqytta oqiǵanyń barlyq mán-jaiy anyqtalyp jatyr. Quzyrly organdar men jaýapty mekeme ókilderi tekserý júrgizýde.
