Atyraýda eki kúnde 9 adam qus etinen daiyndalǵan donerden ýlanyp qaldy. Olar taǵamdy dúńgirshekten satyp alǵan, dep habarlaidy QazAqparat.
Oblystyq sanitariialyq-epidemiologiialyq baqylaý departamenti basshysynyń orynbasary Áliia Bekeshovanyń málimetinshe, óńirde tamaqtan ýlaný deregi jyl basynan beri alǵash ret tirkelip otyr.
«Keshe oblystyq infektsiialyq aýrýhanaǵa 7 adam ýlaný diagnozymen tirkeldi. Al, búgin taǵy 2 jaǵdai anyqtalyp otyr. Oqiǵa S. Datov kóshesinde ornalasqan jekemenshik «Afisha» dúńgirsheginde bolǵan. Zardap shegýshiler tez taǵam daiyndaý ornynan qus etinen jasalǵan doner jegen. Osy oqiǵaǵa bailanysty Atyraý qalalyq politsiia basqarmasynyń qyzmetkerleri tergeý amaldaryn júrgizip jatyr. Qazir tiisti saraptamalar taǵaiyndaldy. Dúńgirshek jumysyn ýaqytsha toqtatty. Al, zardap shegýler dárigerlerdiń jiti qalaǵalaýyna alyndy», - deidi Áliia Bekeshova.
Departament basshynyń orynbasary Gúlnaz Irbatyrovanyń aitýynsha, kóktem-jaz ailarynda jedel ishek infektsiiasy aýrýynyń qaýpi artady. Ishek juqpalary – as qorytý jolyn zaqymdaityn ziiandy aýrýdyń biri. Sondyqtan, únemi jeke bas gigienasyn saqtap, azyq-túlikti belgilenbegen oryndardan satyp almaý kerek.
Budan buryn Atyraýda adam ómirine qaýipti 1,5 tonnadan astam taýyq eti joiylǵan edi.
Atyraý qalasyndaǵy kóterme jáne bólshek saýda nysandarynan sanitarlyq-epidemiologiialyq saraptama júrgizý úshin 108 túrli taýyq etiniń synamasy alynǵan. Saraptama nátijesinde 40%-dan astamy Keden odaǵynyń tehnikalyq reglamentteri talaptaryna sáikes kelmeitini anyqtalǵan.
«Makinsk qus fabrikasy» JShS-niń broiler-balapan etinen adam ómirine qaýip tóndiretin bakteriologiialyq kórsetkishi tabyldy. Osyǵan bailanysty iri kásipkerlik sýbektisi – «Metro Kesh end Kerri» JShS-ǵa jospardan tys tekserý taǵaiyndaldy. Tekserý kezinde ónim sapasynyń talapqa sáikes emestigi anyqtalyp, satylymdaǵy 1 tonna 597,65 keli broiler taýyq etin joiý týraly sanitarlyq-epidemiologiialyq nusqama berilgen bolatyn.
