Atyraýda destrýktivti dini aǵymnyń 44 ókiline 1,9 mln teńge aiyppul salyndy, dep habarlaidy QazAqparat.
Atyraý oblystyq din isteri basqarmasynyń basshysy Qairolla Kóshqalievtiń aitýynsha, ákimshilik quqyq buzýshylyq quqyq qorǵaý organdarynyń qyzmetkerlerimen birge áleýmettik jelige júrgizilgen monitoringte anyqtalǵan.
«Destrýktivti aǵymǵa erýshilerdiń kópshiligi óz paraqshalarynda jáne pablikterde Qazaqstan Respýblikasynyń aýmaǵynda tyiym salynǵan ekstremistik ideologiiany nasihattaýǵa nemese úgitteýge baǵyttalǵan beine jáne aýdiomaterialdardy jariialaǵan.
Biylǵy 8 aida basqarmanyń aqparattyq-taldaý ortalyǵynyń mamandary dástúrli emes dini baǵytty nasihattaityn 143 825 paraqshany buǵattady. Sondai-aq, dini baǵyttaǵy aqparatty taratatyn áleýmettik jelilerdegi paraqshalardy zerdeleý nátijesinde 139 240 bet anyqtaldy. Onyń 442-si jat ideologiia materialdaryn taratýǵa arnalǵan. Sol sebepten, dintaný saraptamasyna jiberildi», -deidi Qairolla Kóshqaliev.
Onyń málimetine súiensek, 8 aida monitoringtik nátijesimen QR Ákimshilik quqyqbuzýshylyq týraly Kodeksiniń 453 jáne 490-babymen destrýktivti dini aǵym ókilderi tarapynan 44 ákimshilik quqyq buzýshylyq anyqtalǵan. Jinaqtalǵan materialdar sotqa joldanyp, salynǵan aiyppuldyń jalpy somasy 1 917 347 teńgeni quraǵan. Qazir 8 ákimshilik is sotta qaralyp jatyr.
