Foto: ©Turar Qazanǵapov
Atyraýda adam urlaý men zorlaýǵa qatysty qylmysty jasyrǵan politseiler sottaldy, dep habarlaidy QazAqparat.
Búgin bul is Atyraý qalasynyń №2 sotynda qaraldy. Eki ýchaskelik politsiia inspektoryna Qylmystyq kodekstiń 370-babynyń 2-bóliginiń 1) tarmaǵymen (Aýyr zardaptarǵa alyp kelgen qyzmettegi áreketsizdik), jedel ýákil men tergeýshige 433-baptyń 3-bóliginiń 1 jáne 2) tarmaǵymen (Aasa aýyr qylmysty jasyrýǵa ne aýyr zardaptarǵa ákep soqqan aldyn ala sóz bailasý arqyly adamdar toby jasaǵan qylmystyq quqyq buzýshylyqty jasyrý) aiyp taǵylǵan.
«Sot talqylaý kezinde mynadai jait anyqtaldy. Jábirlenýshi D tanysy Ý-dyń ózin urlap, zorlap, úiine zańsyz kirgeni týraly politsiiaǵa aryz túsirgen. Alaida, ýchaskelik politsiia inspektorlary A men K jábirlenýshi D.-nyń aryzyn qaramai, ony jasyryp, K jalǵan hattama toltyrǵan. Inspektorlar qylmysty ashýǵa eshqandai áreket jasamai, ózderiniń jumystaryn jeńildetý maqsatynda qyzmettik áreketsizdik tanytqan. Jedel ýákil T jáne tergeýshi L jábirlenýshi D olardan kómek surap kelgenine qaramastan, ony urlap jáne zorlaǵany boiynsha shara qoldanbai, jábirlenýshinin aldap, aýyr sanattaǵy eki qylmysty tirkeýden qasaqana jaltarǵan. Nátijesinde Ý óziniń jazasyzdyǵyn sezinip, D-nyń densaýlyǵyna aýyr ziian kelýine, aýyr zardaptyń oryn alýyna jol bergen», - dep habarlady №2 sottyń baspasóz qyzmeti.
Sottalýshylardyń kinási jábirlenýshiniń, onyń ókiliniń, kýálerdiń aiǵaqtarymen, saraptamalar qorytyndylarymen, beinejazbalarmen dáleldendi. Prokýror sottalýshylar A men K-ny ómir boiyna, T men L-ny bes jyl merzimge quqyq qorǵaý organdarynda qyzmetpen ainalysý quqyǵynan, arnaiy ataǵynan aiyryp, barlyǵyna bas bostandyǵynan aiyrý túrindegi jaza taǵaiyndaýdy suraǵan. Al, sottalýshylar taǵylǵan aiyppen kelispei, ózderin aqtaýdy suraǵan.
Sot A men K-nyń qylmystyq jaýaptylyǵy men jazasyn jeńildetetin mán-jai retinde olardyń asyraýynda jas balalary baryn, sottalýshy L-nyń shynaiy ókingenin eskerdi. Sottalýshy T-da jazasyn jeńildetetin mán-jailar anyqtalmady. Sottalýshylardyń qabyldaǵan antty buzýy jazany aýyrlatatyn jaǵdai dep tanyldy.
«Sot úkimimen sottalýshylar A men K-ny ómir boiyna, T men L 5 jylǵa quqyq qorǵaý organdarynda qyzmetpen ainalysý quqyǵynan aiyryldy. L-ǵa - 3 jyl, A, K, T-ǵa 4 jyl merzimge bas bostandyǵynan aiyrý jazasy taǵaiyndaldy. Sottalýshylar arnaiy ataqtarynan aiyryldy. «Raqymshylyq jasaý týraly» Zańǵa sáikes, T jáne L-ǵa taǵaiyndalǵan bas bostandyǵynan aiyrý jazasynyń merzimi úshten bir bóligine, iaǵni T-ǵa 1 jyl 4 aiǵa, L-ǵa 1 jylǵa qysqartyldy», -dep málim etti sottyń baspasóz qyzmetinen.
Sot úkimi zańdy kúshine engen joq.
