Atyraýda 60 adamdy jumysqa ornalastyrýǵa ýáde bergen alaiaq ustaldy, dep habarlaidy "Ult aqparat".
Oblystyq politsiia departamenti baspasóz qyzmetiniń málimetinshe, Atyraýda Qyzylorda oblysynyń turǵyny «Teńiz kenishine jumysqa ornalastyramyn» dep 60-qa jýyq adamnyń aqshasyn alǵan.
«Jumys izdep, qaltasy qaǵylǵan turǵyndar alǵashqyda jalǵan kelisimshart jasaǵanyn bilmeidi. Sebebi, alaiaqtyq qylmys egjei-tegjei uiymdastyrylǵan. Onyń dáleli jasalǵan tólemderge berilgen túbirtekter. 39 jastaǵy alaiaq azamattardyń 50 millionnan astam teńgesin qaltasyna basqan. Aldanǵandardyń arasynda atyraýlyqtardan bólek Qyzylorda, Túrkistan, Aqtóbe oblystarynyń turǵyndaryndary da bar», - dedi oblystyq politsiia departamentiniń bastyǵy, politsiia polkovnigi Qamza Úmbetqaliev.
Onyń aitýynsha, kúdikti bastapqyda «Talapker & Company» JShS-i arqyly jumys izdep kelgen azamattarǵa laiyqty keńse izdegen. Sóitip, Qulsary qalasynyń Ortalyq yqsham aýdanynan keńseni jalǵa alǵan. Osylaisha, óziniń qylmystyq piǵylyn júzege asyrý úshin birneshe qyzmetkerdi eshqandai kelisimshartsyz jumysqa alyp, olarǵa qolma-qol jalaqy tólep otyrǵan.
«Azamattarmen tikelei qarym-qatynas ornatý úshin 47 jáne 29 jastaǵy eki tanysyn paidalanǵan. Kelisimshart úlgilerin kórsetip, ekeýine ár tapqan adamy úshin aqsha beretine sendiredi. Jumysqa ornalasý aqysy 150 000-450 000 teńge aralyǵyn quraǵan. «Talapker & Company» JShS-niń atqarýshy basshysy alaiaqtyq áreketi úshin sot úkimimen 3 jyl 6 ai merzimge bas bostandyǵynan aiyryldy» - dep deidi Qamza Úmbetqaliev.
