Atyraý qalasyndaǵy jaǵymsyz iis problemasy qalai sheshiledi? Bul suraqqa Ekologiia, geologiia jáne tabiǵi resýrstar ministri Maǵzum Myrzaǵaliev jaýap berdi, dep habarlaidy "Ult aqparat".
«Shynynda da, mundai faktiler boldy. Mundai jaǵdai shilde aiynda bastaldy. Biz qorshaǵan ortanyń sapasyn kúndelikti qadaǵalap otyramyz. Eki fakt bar. Birinshiden, bul qalanyń soltústik bóliginde ornalasqan qatty qaldyqtar poligonyndaǵy problema. Ekinshisi - «Týhlaia balka» býlaný alańy», - dedi Maǵzum Mirzaǵaliev.
Ekologiia ministrliginiń basshysy bul máseleniń sheshimi - jańa poligon salý ekenin atap ótti.
«Ákimdik jańa poligonǵa 50 gektar jer bólip berdi, jobalyq-smetalyq qujattama jasaldy. Jaqynda ákimdik barlyq sanitarlyq talaptarǵa sai zamanaýi poligon salýdy bastar degen senimdemiz. Ekinshi másele - sol «Týhlaia Balka». Ózim sonda bardym. Másele barlyq aǵyndy sýlardyń sol jaqqa tazartýsyz nemese jetkiliksiz tazalanýymen tógilýinde. Osyǵan bailanysty biz ákimdikpen birlesip jumys júrgizdik. Atyraý qalasynyń sol jaǵalaýynda kárizdi tazartatyn jańa qurylystar salynatyn ýchaske anyqtaldy. Onyń 2020 jyldyń sońynda paidalanýǵa beriletini kútilýde. Osylaisha Atyraý qalasynda zamanǵa sai kárizdi tazartý qondyrǵy máselesi sheshiletin bolady. Sonymen qatar, kelesi jyldan bastap jergilikti atqarýshy organ - ákimdik pen Atyraý munai óńdeý zaýyty Týhlaia Balka býlaný alańdaryn qalpyna keltirý jumystaryn bastaidy dep kútýdemiz», - dep túiindedi Maǵzum Mirzaǵaliev.
